Килешүгә кул куелды

27 июньдә Уфада Башкортстан Республикасы аграрийларын сезонлы кыр эшләрен башкару өчен кирәкле авыл хуҗалыгы техникасы белән тәэмин итүгә юнәлдерелгән килешүгә кул куелды. Документка БР Хөкүмәте Премьер-министры урынбасары - Авыл хуҗалыгы министры Илшат Фазрахманов һәм «Гомсельмаш» белорус холдингы генераль директоры Александр Новиков кул куйдылар. Чара 27 июньдә Россия һәм Белоруссия төбәкләренең Х форумы кысаларында узды.

Килешүгә кул кую алдыннан республикада «Гомсельмаш» холдингының рәсми дилеры «Агросила» сәүдә йортының сервис үзәге ачылды.

– Башкортстан агросәнәгать комплексының техник паркын актив яңартуны дәвам итәргә планлаштырабыз, - диде Илшат Фазрахманов. - Безгә сыйфатлы ашлык җыю һәм азык җыю комбайны, заманча терлекчелек җиһазлары кирәк. Без Беларусь Республикасын бу мәсьәләдә төп стратегик партнер дип саныйбыз.

Килешү 2023 һәм 2024 елларда Башкорт аграрийларына ел саен «Гомсельмаш» һәм «Брянсксельмаш» җитештергән 100 берәмлектән ким булмаган тулы комплектлы ашлык җыю һәм азык җыю комбайны китерүне гарантияли. Документ шулай ук төбәкнең авыл хуҗалыгы җитештерүчеләренә 10 процент күләмендә өстәмә ташлама кертүне дә күздә тота.

Моннан тыш, Гомсельмаш ашлык җыю комбайннарын, үзйөрешле кыргычларны һәм үзйөрешле азык җыю агрегатларын ремонтлаганда кулланыла торган узелларга, агрегатларга, запас өлешләргә 5% ташлама бирәчәк. Белорус партнеры Башкорт дәүләт аграр университеты базасында үзйөрешле урып-җыю техникасын практик өйрәнү өчен уку лабораториясен җиһазлауда ярдәм күрсәтәчәк.

Белешмә:

Белорус “Гомсельмаш” холдингы авыл хуҗалыгы техникасы җитештерүчеләрнең иң эреләренең берсе, комбайннар һәм башка катлаулы авыл хуҗалыгы машиналары дөнья базарында лидерлар санына керә. Холдинг ашлык җыю һәм азык җыю комбайны, башлангыч җыю һәм бәрәңге җыю комбайны, кыргычлар һәм башка авыл хуҗалыгы техникасы модельләрен чыгара.