Башкортстанның яшь футболчылары рекорд куйды

Дмитрий Чернышенко Уфага эш сәфәре белән килде.

Яңа футбол мәйданы 6,5 мең квадрат метр тәшкил итә, ул Орджоникидзе районындагы “Нефтяник” стадионы янында урнашкан. Объектның хакы – 653 миллион сум. “Спорт – тормыш нормасы” федераль проекты кысаларында аны төзүгә федераль казнадан 550 миллион сум акча бүленгән. Монда, нигездә, республика балалар футболы үзәгендә уйнаучылар шөгыльләнәчәк.

Дмитрий Чернышенко белән Радий Хәбиров объектны карады, “Мин – герой” исемле фиджитал-футбол турнирына старт бирделәр. Бу – яңа спорт төре. Әйткәндәй, 2024 елның февраль аенда Русиядә “Киләчәк уеннары” дип аталган халыкара мультиспорт турниры үтәчәк. Аның программасында – 16 дисциплина, берсе – фиджитал-футбол.

• “Спорт – тормыш нормасы” федераль проекты кысаларында Русия Хөкүмәте белән Башкортстан җитәкчеләре балаларга яхшы бүләк ясады, - дип билгеләде Дмитрий Чернышенко. Ул “Приволжье” үсмерләр футбол лигасында катнашучы “Уфа” төбәк үзәгенең балалар-үсмерләр командасы өчен 50 комплект футбол экипировкасына сертификат бүләк итте.

Радий Хәбиров “Авыл тренеры” программасына ярашлы республиканың авылда эшләгән тренерларына 1 миллион сумга сертификат бирде. Өч ел эчендә 100 тренерга дәүләт ярдәме күрсәтелгән.

• Мондый футбол мәйданнары күп булырга тиеш, безнең бурычыбыз – төзергә, төзергә һәм төзергә. – диде республика башлыгы. – Көрәш сарае, фехтование сарае, бик күп ФОКлар һәм бассейннар төзиячәкбез. Бу безнең кызларга һәм малайларга тормышта яхшы, стильле кешеләр булырга ярдәм итсен, өлкәннәрне хөрмәт итәргә һәм бер-берләренә ярдәмләшергә өйрәтсен.

Мәйдан ачылу уңаеннан республиканың 669 яшь футболчысы чеканка буенча яңа дөнья рекорды куйды. Моның өчен Русиянең рекордлар китабы редакциясен чакырганнар иде.

Бу көнне мәйданда 2010-2011 елда туган малайлар арасында Уфа шәһәре беренчелегенә финал уеннары үтте. Дмитрий Чернышенко белән Радий Хәбиров “Уфа” һәм “Рубин” командалары өчен уйнап күрсәтте.

Чыганак:glavarb.ru