Тагын бер зур спорт комплексына нигез салынды

15 декабрьдә, Уфада, Башкортстан Башлыгы Радий Хәбиров Ленин районындагы Башкортстан фехтование үзәге төзеләчәк мәйданда булды. Биредә булачак спорт корылмасы нигезен билгеләү тантанасы үтте.

Фехтование үзәген төзү турында карар 2021 елның августында Токиода XXXII җәйге Олимпия уеннары җиңүчеләре һәм призерлары - фехтовкалаучылар Аделина Заһидуллина һәм Тимур Сафин белән очрашудан соң кабул ителде. Яңа объект Рима Баталованың Республика спорт күнегүләре үзәге янында урнашачак.

Төзелешне башлап җибәрү тантанасында Башкортстан башлыгы Радий Хәбиров, фехтование буенча Олимпия чемпионнары Софья Великая, Софья Позднякова һәм Тимур Сафин чыгыш ясадылар.

- Төзеләчәк фехтование үзәге - Башкортстаннан булган фехтовкалаучыларга рәхмәтебез, алар республика өчен бик күп медальләр яуладылар. Спортчылар һәм тренерлар белән киңәшләшкәннән соң, без фехтование үзәгенә бөек тренер Рамил Аюпов исемен бирергә булдык, - диде Радий Хәбиров.

Русия фехтование федерациясенең башкарма директоры Игорь Кучеренко республика җитәкчелегенә физик культура һәм спорт үсешенә игътибар иткәннәре өчен рәхмәт белдерде.

- Яңа үзәктә көчле спортчылар тәрбияләнер дип ышанам, алар Башкортстаны алдагы көндә дә данлаячаклар ", - диде ул.

 - Бүген бу тантанада катнашу минем өчен зур дәрәҗә. Хәзер күп балалар бу спортны яраталар һәм мондый үзәкләр бик кирәк. Танылган Башкортстан фехтовкалау мәктәбе Олимпия чемпионнарын тәрбияләүне дәвам итәр дип ышанам, - диде Софья Великая.

Республиканың фехтование үзәге 2024 елда ачылачак һәм Уфаның 450 еллыгына бүләк булачак. Монда республика, төбәкара һәм илкүләм дәрәҗәдәге ярышлар узачак.

- Фехтовкалаучылар өчен үз йорты булу алдагы көндә спорт үсешендә мөһим адым. Күпчелек балалар безнең үзәккә килерләр, күнегүләр ясарлар һәм җиңүгә омтылырлар дип ышанам”, - диде Олимпия чемпионы Тимур Сафин.

Чыганак:glavarb.ru

Фото:glavarb.ru