Радий Хәбиров Әфганстанда һәлак булган яугирләрне искә алды

Бу көнне нәкъ 33 ел элек СССР Әфганстаннан үз гаскәрләрен чыгарды. 10 ел дәвам иткән сугыш 14 меңнән артык хәрбиләр гомерен өзде. Әфганстаннан 343 башкортстанлы кайтмады. Ә гомумән алганда локаль хәрби конфликтларда  Башкортстанда яшәүче 668 кеше  һәлак булган.  

Тантанада шулай ук почетлы кунаклар, хәрби ветераннар, һәлак булганнарның ата-аналары, курсантлар, кадетлар, уфалылар катнашты. 

Чәчәкләр салганнар соң Радий Хәбиров бу датаның әһәмияте хакында әйтеп үтте: 

- Яугир-интернационалистлар - иң җаваплы, көчле һәм лаеклы кешеләр, - диде ул. - Мин студент чакта Байкал артына армиягә җибәрделәр. Ә кемнәрнедер Әфганстанга җибәрәләр иде. Без һәрчак аларга хөрмәт белән карый идек. Аларга ул чакта 18-19 яшь иде, япь-яшь малайлар. Алар сугышалар, яраланалар, һәлак булалар иде. Киткәннәр һәрчак безнең хәтердә саклана. Ә инде кайтучылар - дәүләтебез терәге. Алар батыр, намуслы, ышанычлы кешеләр. Мин аларга тирән хөрмәт белән карыйм һәм ныклы сәламәтлек телим. 

Чыганак: glavarb.ru