"Уфа" аэропорты ничек яши?

Башкортстан Республикасы Башлыгы Радий Хәбиров үткәргән киңәшмәдә Мостай Кәрим исемендәге “Уфа” халыкара аэропортыннан авиаочышлар челтәре маршрутларын үстерү турында сөйләштеләр.

Транспорт һәм юл хуҗалыгы министры вазифаларын башкаручы Виктор Жульков әйтүенчә, 2020 елда Башкортстанда төбәктәге авиаташуларны субсидияләүгә 87 млн. сум акча бүлгән булганнар. Быел исә – 120 млн сум. Республика территориясеннән субсидияләнә торган авиамаршрутларга алты юнәлеш кергән: Екатеринберг, Волгоград, Киров, Краснодар, Дондагы Ростов һәм Самара.

• Екатеринбургка – “Ред Вингс”, Краснодарга һәм Дондагы Ростовка – “Азимут”, Кировка – “Руслайн”, Самара һәм Волгоградка “Ютэйр” авиакомпанияләре рейсларны башкарачак, - диде Виктор Жульков..

Уфа шәһәреннән Махачкала, Надым, Ноябрьски, Салехард, Нижневартовск һәм Яңа Уренгойга авиарейсларны республика катнашлыгыннан башка башка төбәкләрнең казналарыннан субсидиялиләр.

Мостай Кәрим исемендәге “Уфа” халыкара аэропортының эшчәнлеге турында генераль директор Александр Андреев сөйләп үтте. 2020 елда безнең аэропорт Идел буе федераль округында лидерлыкны саклап калган.

• 2020 елда “Уфа” аэропортының пассажир агымы 2,376 млн кеше тәшкил итте, - диде ул. – Пандемия башланганчы булган саннарга караганда 33 процентка азрак. Әмма Идел буе федераль округының башка төбәкләре белән чагыштырганда яхшырак.Әйтик, Казанда саннар – 37, Самарада – 44, Түбән Новгородта 48 процентка кимрәк тәшкил итте.

“Уфа” аэропортыннан Әрмәнстан, Кыргызстан һәм Белоруссиягә самолетлар оча. Киләчәктә Евразия икътисади союзына кергән илләргә рейслар ачарга планлаштыралар.

Радий Фәрит улы Мостай Кәрим исемендәге “Уфа” халыкара аэропортының эшчәнлеген уңай бәяләде. Ул Уфадан Австрияга, Германиягә, Израильгә рейсларны тергезергә кирәк диде.

Аэропорт территориясендә яңа халыкара кунакханә төзүнең кирәклеген дә ассызыклап үтте төбәк җитәкчесе. Уфа шәһәренең 450 еллыгына ул төзелеп бетәргә тиеш.

Чыганак һәм фото: glavarb.ru