Юлда ике исерек очрашкан

Бүген төнлә Белорет шәһәренең Блюхер урамында исерек машина йөртүчеләр авария оештырган. БРның дәүләт автоинспекциясендә хәбәр итүләренчә, Ford Mustang руле артындагы 31 яшьлек ир-ат каршына килүче Hyundai Creta белән бәрелешкән. Hyundai Creta белән 22 яшьлек водитель идарә иткән.

“Hyundai Creta белән Ford Mustang капма-каршы бәрелешкән. Hyundai-да кысылып калган ир-атны транспорт чарасын кисеп алып, медикларга тапшырганнар”, – диләр БР буенча Гадәттән тыш хәлләр министрлыгында.

Hyundai-ның водителе һәм аның 16 яшьлек пассажиры – дәваханәдә. Медицина ярдәме шулай ук  Ford-ның 27 яшьлек пассажирына да таләп ителгән.

“Медицина тикшерүе ике водительнең дә исерек булуын күрсәтте. Авария очрагы буенча тикшерү оештырылды. Экспертизалар билгеләнде”, – диделәр төбәк автоинспекциясендә.

Чыганак: bashinform.ru