Уфада бер кешене мошенниклар 12 млн сумга алдаган

Эчке эшләр министрлыгының Башкортстан буенча матбугат хезмәтендә хәбәр итүләренчә, ул инвестицияләр белән баерга уйлаган.

Зыян күрүче Русия Эчке эшләр министрлыгының Уфа буенча 8 нче полиция бүлегенә мөрәҗәгать иткән. Ул 20 марттан 2 майга кадәр таныш булмаган бер ир белән телефон аша шалтыратышып торуын сөйләгән.

Мошенник үзен бик зур саналган валюта биржасы хезмәткәре дип таныштырган һәм 47 яшьлек иргә инвестицияләр ярдәмендә керемен арттырырга тәкъдим иткән. Уфалы биржа сатуларының үзенчәлекләрен аңлар өчен тәҗрибәсе җитәрлек дип уйлаган. Һәм чыннан да, аның счетына акча тама башлаган — имеш, инвестицияләрдән табыш килә башлаган. Шуның белән илһамланып, виртуаль пирамидага ул 12 млн сумга якын акча керткән. Шуның 9 млн сумы - кредит, 3 млн сумнан артыгы туганнарыннан һәм дусларыннан бурычка алынган һәм 500 мең сум гына үзенең акчасы була. Зыян күрүче банкомат аша мошенникларга акча күчергән.

Хәзер инде җинаять эше кузгатылган.