Хәйбуллада атлар карагын тотканнар

42 яшьлек Ырынбур кешесе Башкортстаннан атлар урлап алып кайтып сатарга уйлаган.

Русия Эчке эшләр министрлыгының Хәйбулла районы бүлеге хезмәткәрләре Ырынбур өлкәсендәге хезмәттәшләре белән берлектә җинаятьчене тотканнар. Оператив-эзләү чаралары барышында Хәйбулла районының Сәгыйть авылы янында үзләре генә йөргән 2 атны машинасы белән урлап качуы ачыкланган.

Элегрәк тә шундый ук урлашу өчен хөкем ителгән 42 яшьлек ир терлекләрне үз ягына алып кайтып барганда кулга алынган. Ир алдан ук ат урларга әзерләнеп, Хәйбулла районына килүен сөйләгән. Үзенең «Газель» машинасын читтәрәк калдырып, атлар көтүе янына җәяү барган һәм аларны берәм-берәм алып киткән.

Ырынбур өлкәсендә яшәүче бу кешегә карата урлау факты буенча җинаять эше ачылган.