Юл фаҗигасе булмаган көн юк

Бүген, 26 августта, Иглин районында беръюлы дүрт машина бәрелешкән.

Юл һәлакәте Самара-Уфа-Чиләбе юлында булган. Алынган мәгълүматларга караганда, "Шкода Октавия", "Мазда", "КИА Спектра" һәм Газель бәрелешкән.

Авария нәтиҗәсендә "Мазда" водителе, 7 һәм 14 яшьлек ике пассажир хастаханәгә озатылган.

Шулай ук, Миякә районында исерек водитель аркасында килеп чыккан юл фаҗигасендә бер бала зыян күргән.

Кыргыз-Миякә авылында "Шевроле Круз" белән ВАЗ-2114 бәрелешкән.

Авария нәтиҗәсендә, 15 яшьлек ВАЗ-2114 пассажиры төрле җәрәхәтләр белән хастаханәгә озатылган. "Шевроле Круз" водителе - 35 яшьлек ирнең исерек хәлдә булуы ачыкланган.

Тикшерү нәтиҗәсендә аның организмында 0,973 мг/л алкоголь күрсәткән. Әлеге шоферның 2012 елдан башлап инде өченче тапкыр исерек килеш руль артына утыруы ачыкланган.

Руль артына эчеп утыру – үзеңне дә, башкаларны да белә торып үлемгә китерү дигән сүз. Көнаралаш булган һәлакәтләрнең күбесе эчкелек нәтиҗәсендә. Статистика буенча, һәр дүртенче юл һәлакәте исерек машина йөртүче гаебе белән килеп чыга.