Аңламаган...

Киров районы суды. Судьяны көтәбез. Илфат (исеме үзгәртелде) икенче тапкыр эчеп руль артына утырганы өчен хөкем карары көтә. Адвокатыннан рөхсәт алып Илфат янына килдем.

• Илфат, әз генә сөйләшеп алыйк әле...

Ул ризалык биреп баш какты. Гел иеп утырган башын күтәреп миңа карады. Карашы моңсу, хөкем карарын куркып кына көтеп утырганы күренеп тора.

• Хәл ничек булды? - димен.
• Үзем дә белмим инде. Шайтан суы капсам, руль артына утыра торган гадәтем бар...Нигә утырамдыр, үзем дә белмим... Айныгач, үкенәм дә бит...
• Сезне бер тапкыр эчеп эләгеп, хөкем ителгән диделәр...
• Әйе, былтыр җәй эләгеп, ике елга водитель таныклыгыннан мәхрүм иттеләр, 180 сәгатькә төзәтү эшләре билгеләделәр. Икенчегә эләксәң 5 елга кадәр утыртырга мөмкиннәр...
• Нык исерек идегез мени?
• Канымда 0,175мг/л табылды...

Судьяның сәркәтибе безне хөкем залына чакырды. Судья хөкем карарын укый башлады. Илфатның бер тапкыр эчеп эләгүе дә әйтелде, аны инде бер тапкыр хөкем ителгәнгә саныйлар, 2014 елда туган баласы барлыгын да исәпкә алдылар һәм 10 айга колоние-поселениега җибәрергә дигән карар чыгардылар. Эпидемиологик хәлне исәпкә алып, хөкем вакыты үтәсе колонияга ул үз җае белән барырга тиеш.

Менә шулай итеп Илфат чәнечкеле тимер чыбыклар артына барып эләкте. Ни өчен? Эчеп руль артына утырганы өчен.

Илфат белән башкача сөйләшмәдем, аның күңеле ниләр кичерүен аңлый идем...