Ашыгулар һәлакәткә илтә

Олеся белән Стәрлетамак шәһәрендәге 6 нчы санлы колония-поселениедә таныштык. Хатын-кызлар участогында нигездә, юл-транспорт авариясе ясаганнар, алимент түләмәүчеләр җәза вакытын үткәрә.

– Наркотик белән эләгүчеләр дә очрый, мошенниклык кылу, урлашучылар бар. Җәза вакытлары – бер айдан алып өч ел ярымга кадәр. Безгә алар суд карар чыгаргач үзләре киләләр. Тәртибе шундый, - ди колония җитәкчесе, эчке хезмәт майоры Салават Гаяз улы Әхмәтов.

Хөкем ителүчеләрнең барсы да теплицада эшли. Без кергәндә ике хөкем ителүче ханым чәчкәләргә су сибеп йөри иде.

• Олеся! – дип чакырып алды берсен Салават Гаяз улы. Олеся дигәне шунда ук тиз генә колония җитәкчесе янына йөгереп килеп җитте.
• Таныш булыгыз, - диде җитәкче миңа карап. – Олеся Васильевна Зәйналгабдинова. Юл-транспорт фаҗигасе ясаган өчен 3 елга ирегеннән мәхрүм ителгән. Бер ел була аның монда килгәненә. Бер генә кисәтү дә алганы юк, тәртибе үрнәкле, эшли... Өенә кайтып килергә рөхсәт сорый. Бүген төштән соң комиссия җыелачак һәм хәл итәчәк...

Монда ничек килеп эләгүе турындагы сорауга ул башта җавап бирми торды...

• Иң куркынычы артта калды инде, - диде... Аннан бераз уйланып торгач:
• Ул көнне кайнәм белән кызымны утыртып кунакка киттек. Уфа шәһәрендә Чесноковка бистәсенә борылганда ашыктым, чыгып өлгерермен дип уйладым, юлдан килгән машина исә юл йөрү кагыйдәсе буенча мине көтеп торыр дип уйлаган һәм тизлеген киметмәгән... Шулай итеп бәрелештек... Кайнәм һәлак булды ,кызым бик авыр җәрәхәтләр алып исән калды...

Олесяның күзләренә яшь тулды. Аңа бу фаҗигане искә алуы, әлбәттә, авыр иде.

• Руль артына утырасың икән, ашыкмаска кирәк, дигәнне онытабыз шул. Минем өчен гомерлек кайгы, үкенеч булды бу фаҗига, - диде күзләрен сөртеп.

Олеся хөкем ителгәнче автомобиль юуу салонында администратор булып эшләгән. Ире – вахта ысулы белән йөреп эшли, кызы кияүгә чыккан, улы бар.

• Өйгә кайтып якыннарымны күрәсем килә, – диде ул. Икенче мөһим максаты – хезмәт биржасына кереп эш белешү икән. Чөнки бер елдан аның шартлы рәвештә иреккә чыга алу мөмкинлеге җитә.

Гыйбрәт хәл бу. Җанны төрле-төрле уйлар телгәли: язмышмы әллә ялгышмы? Тыныч кына ятасы бит өйләрендә.

Тимер чыбыклар белән әйләндереп алынган бу дөньяның үз тормышы, үз мәшәкатьләре, үз кагый­дәләре. Монда тормыш кайнап тора дип әйтеп булмаса да дә, әкрен генә бер агымга – конвейерга куелган шикелле бара да бара. Тоткыннарның әти-әниләре, ирләре, балалары килә. Колониядә әледән-әле төрле чаралар үткәрелеп тора. Кемдер елмая, кемдер күз яшьләрен сөртә. Хатын-кызны рәшәткәләр артында  күрү аеруча авыр. Ул бит бу дөньяга кадер-хөрмәт күрү, ярату-сөелү өчен килә. Менә шулай сак астында йөрү өчен түгел...

                          Эльвира Әсәдуллина.