Шулай итсәң, болай була!

Киңәш  беркайчан да артык булмый. Һәр хуҗабикә үзенә кирәген сайлап алып, хәтер сандыгына салып куя ул.

*Пешергәндә дөге ак булсын,  таралып торсын дисәгез, пешергән суга 1 аш кашыгы серкә салыгыз. Әгәр кәстрүлегез кечкенә булса, әзрәк салырга кирәк.

*Соусны каймак белән ясаганда аңа сөт кушыгыз. Шулай иткәндә каймак оемый.

* Кыздырганда кәбестә көрән төскә кермәсен дисәгез, аны вак итеп турап, өстенә кайнар су коегыз. Аннары түгеп, салкын су салыгыз. Тиз ген  сыгып алыгыз да табага салыгыз.

* Кәһвәгә аз гына тоз салганда исе хуш булыр.

*Соус ясаганда рецептта күрсәтелгән ак шәраб юк икән, аз гына серкәдә ике шакмак шикәрне эретегез дә аны ак шәраб урынына кулланыгыз.

*Озак вакыт ачык торган томат пастасының өстендә күгәрек барлыкка килмәсен өчен аның капкачына коры гәрчич сөртергә кирәк.

*Чөгендер тизрәк пешсен өчен аны бер сәгать пешереп, 10 минутка салкын суга салырга кирәк.

*Майонезны өйдә буягычларсыз һәм химиясез ясарга була. Каймакка бер чәй кашыгы гәрчич һәм уылган пешкән йомырка  сарысы кушабыз.

* Бәрәңге һәм макарон пешкән суны түкмәгез. Аны суытып, гөлләрегезгә сибегез. Менә дигән тукландыру була. Бары тик суда тоз булырга тиеш түгеллеген генә онытмагыз.

*Куллардан яшелчә һәм җиләк-җимеш тапларын бетерү өчен чи бәрәңгене урталай кисегез һәм кулларыгызга сөртегез.