Зикерләр турында хәдисләрдә ни әйтелә?

Әбү Муса радыйАллааһу гәнһү Аллаһның рәсүле салләллааһу гәләйһи вә сәлләм әйтеп калдырган түбәндәге хәдисне җиткерде.

“Үзенең Раббысына зикер кылган һәм зикер кылмаганның аермасы тере һәм үле кешеләрнең аермасы кебектер” (Бохари).

Ххх

Мөгаз әль-Җүхәни (р.г.) әйтеп калдырган хәдистә түбәндәге юллар бар. “Бер вакыт бер кеше Аллаһның Рәсүле (с.г.с.) янына килде һәм сорады:

• Кайсы җиһад әҗер-саваплар ягыннан бөегрәк?

Аллаһның Рәсүле (с.г.с.) шулай җавап бирде:

• Кайсысында Аллаһу Тәгаләгә күбрәк зикер әйтелә.
• Ә кайсы ураза әҗер-саваплар ягыннан бөегрәк?
• Аллаһу Тәгаләгә күбрәк зикер әйтелгәне!

Аннары бу бәндә намаз, зәкят, хаҗ һәм садәка хакында шундый сораулар бирде. Аллаһның Рәсүле аларның һәммәсенә:

• Кайсысында Аллаһу Тәгаләгә күбрәк зикер әйтелә! – дип җаваплады.

Шунда Әбүбәкер (р.г.) үзенең янындагы Гомәр (р.г.) сахабәгә:

• Әй, Әбү Хафса! Аллаһка зикер әйтүчеләр бөтен яхшылыкны алып киттеләр, - диде.

Аларның сүзләрен тыңлап торган Аллаһ илчесе (с.г.с.) икесенә әйләнеп карады һәм:

• Әйе, бу чыннан да шулай! – диде.

(Әхмәд, Хайсами).

ххх

Мөгаз бин Җәбәл (р.г.) Аллаһның илчесе белән үзе арасында булган шушы сөйләшүне белдергән. Бервакыт Пәйгамбәребез аның кулларыннан тота да болай ди:

• Йә Мөгаз! Аллаһ белән ант итәм, мин сине бик яратам!

Мөгаз (р.г.) болай дип җаваплый:

• Атам-анам Сиңа фида булсын, әй Аллаһның илчесе! Мин дә Сине бик яратам!

Моннан соң Пәйгамбәребез аңа шулай дип белдерә:

• Йә Мөгаз! Һәрбер намазыңны укып, сәлам биргәннән соң сиңа шушы доганы һәрвакыт укырга киңәш бирәм: “Аллаһым! Миңа Сиңа зикер кылырга, шөкер әйтергә һәм күркәм гыйбадәт кылырга ярдәм бир!” (Әбү Давыт, Әхмәд, Нәсаи).

ххх

Әбү Һурайра (р.г.)дан килгән хәдистә шундый юллар бар: “Телгә җиңел әйтелгән ,мизанда авыр булган ,Мәрхәмәтле Аллаһ яраткан ике сүз бар: “Сүбхәәнәллааһи вә бихәмдиһии, Сүбхәәнәллааһиль-Газыыйм” (Бохари, Мөслим),

Ибен Гомәр (р.г.) әйтеп калдырган хәдистә Аллаһның илчесе (с.г.с.) түбәндәгене белдерә. “Аллаһу Тәгалә искә алынмаган файдасыз сүзләр белән мавыкмагыз. Чөнки Аллаһны зикер итмичә сөйләнелгән сүзләр белән мавыгу йөрәкне катыра. Аллаһтан иң ерак кеше – каты йөрәкле кеше” (Тирмизи.

Габдуллаһ бин Буср (р.г.) болай дип сөйли: “Ике бәдәви – гарәп кешеләре Аллаһның илчесенә сораулар белән мөрәҗәгать итү өчен  килде. Аларның берсе болай дип сорады:

• Әй, Аллаһның илчесе, кешеләрнең кайсысы яхшырак?

Аллаһ илчесе болай дип җаваплады:

• Кемнең гомере озын булып, кылган изге гамәлләре күбрәк булса, шул яхшырак.

Икенче бәдәви исә шундый сорау бирде:

• Әй, Аллаһның илчесе. Исламда күп гамәлләр бар. Миңа ныклап ябышу өчен бер гамәлне өйрәт.

Аллаһның илчесе аңа шулай дип җавап бирде:

• Телең Аллаһны зикер итүдән һәрвакыт юеш булсын! (Әхмәд, Тирмизи).

Ххх

Аллаһның илчесе түбәндәгене белдерде.

“Әгәр бер җиргә җыелучылар анда Аллаһның исемен искә төшермәсәләр, гөнаһлы эш эшләгән кебек булырлар. Кем китеп барганда Аллаһу Сүбһәәнәһү вә Тәгаләне искә төшермәсә, начарлык эшләгән кебек булыр. Кем йокларга ятканда Аллаһны искә төшермәсә, шулай ук начарлык кылган кебек булыр” (Әхмәд, Әбү Давыт).

Ххх

 “Җәннәт әһелләре дөньяда вакытта Аллаһны зикер итмәгән мизгелләрен искә алып бик үкенерләр” (Хайсами).

Фатыйма Фаткуллина. Уфа шәһәренең "Ихлас" мәчете каршындагы Вил Казыйханов исемендәге Бөтенрусия әхлак мәктәбе җитәкчесе.