Барлык яңалыклар
Динебез – Ислам
24 ноябрь 2021, 12:14

Ишкар янә мәчетле булды

Республикабызда меңнән артык мәчет эшләп килә. Кайчандыр киселгән манаралар тергезелә, яңа изге йортлар төзелә. Шушы көннәрдә Илеш районының Ишкар авылына да – нур, халыкның күңеленә сафлык иңде: “Ихлас” мәчете ачылды.

Авылның нуры ул - мәчет
Авылның нуры ул - мәчет

Республикабызда меңнән артык мәчет эшләп килә. Кайчандыр киселгән манаралар тергезелә, яңа изге йортлар төзелә. Шушы көннәрдә Илеш районының Ишкар авылына да – нур, халыкның күңеленә сафлык иңде: “Ихлас” мәчете ачылды.

Биредә авыл халкы, авылдан чыккан кешеләр тырышлыгы белән ике ел  вакыт эчендә иман йорты төзелгән. Ишкарлыларның күбесе, аеруча шунда туып-үскәннәр,  мөмкинлекләренә карап, уртак эшкә үз өлешен керткән.

Бу эшне үз кулына алып, башыннан азагына кадәр йөргән авыл старостасы Рагин Ярмөхәммәт улы Хәйруллин, Ишкар авылы хакимияте башлыгы Рөстәм Айдар улы Ногманов , “Ихлас” мәчетенең имам-хатыйбы Ришат хәзрәт Хәйдәршин белән очрашып, әңгәмә корып утырдык.

  • Безнең авылда элек, заманында ике мәчет булган, – дип тарих йомгагын барлады Рагин абый. – Аннан кызыллар килеп бәреп төшергәннәр... Советлар вакытында башка идеология булды, дин арткы планда кала килде. Әмма кеше барыбер үз асылына, иманына кайта кайчан да булса... Мин үзем алты ел хакимият башлыгы булып эшләдем, ул вакытта ук инде авылга мәчет кирәк дигән сүз бар иде. Вакыты җитмәгән булгандыр инде... Авыл халкы белән киңәш кордык та тәвәккәлләдек. Кем күпме булдыра ала, шулай ярдәм итте.

Җиңел булмады... “Нигә кирәк инде ул мәчет?” – дип әйтүчеләр дә булды. Бер каршылыкка да карамый, җиңеп чыктык, Аллаһы Тәгалә үзе биреп торды... Ниятең генә изге, төзек булсын...

Элеккеге колхоздан калган зур тимер савытлар булган. Шуны металлоломга тапшырып, 100 мең сум акча кергән. Котельныйдан калган торбаларны тапшырып тагын 275 мең сум...

Рагин Ярмөхәммәт улы бик күпләргә рәхмәтләрен белдерде.

  • Элекке имамыбыз Фәнил абый Фаррахов шәхсән 50 мең сум акча китереп бирде. Фундамент салганны күрде. Ул вакытта чирли иде инде. “Яхшы эш башладыгыз, мин ачылганын күрә алмам инде”, - диде. Ул колхозда комбайнда да эшләде, звеновод булып та. Динне авылда бик күркәм итеп алып барды. Шулай итеп, акрынлап кына акча җыела барды, мәчет төзелә торды. Мурзин Филүс абый уллары белән җыелышып 50 мең сумнан артык бирделәр, Мардамшиннар, Ризаевлар гаиләләре саллы гына сумма кертте. Солтанов Айдар баганалар белән ярдәм итте, МТС “Центральная” оешмасы җитәкчесе Рим Шәмсетдинов нинди мәсьәлә бар, кулыннан килгәнчә хәл итәргә тырышты. Яшьләр дә килеп эшләде. Ганиев Илфак манара тәрәзәләрен эшләп бирде. Үземнең чордашларым - Хәбибуллин Гыйлман, Габдуллин Фәвәдис, Шәрифҗанов Мөнир ярдәм күрсәттеләр. Барсының да исемен әйтеп бетерә алмыйм, әмма гәзит битләреннән күп рәхмәтләремне җиткерәм.

Авылда динне бүген Ришат хәзрәт җитәкли. Октябрьский мәдрәсәсендә белем ала, киләчәктә ислам университетын тәмамларга ниятли. Җомга намазларына да килүчеләр бар, мосафирлар да керә, ди ул. Мәчеттә көненә биш тапкыр азан әйтелә, намазлар укыла. Балаларны һәм хатын-кызларны җыеп ислам дәресләре оештырырга ниятлиләр.

  • Авыл советына биш – Ишкар, Лаяшты, Байрак, Әшмән, Сәиткол авыллары керә, - дип таныштырды биләмә белән Рөстәм Айдар улы. – Ишкар авылында 274 хуҗалык, 573 кеше яши. ППМИ программасы белән авылда хоккей мәйданчыгы эшләп куйдык, тренажер мәйданчык бар. Лаяшты авылындагы мәдәният йортына газ кертү проблемасы алда тора. Шуны хәл итәргә йөрибез.

“Кич җитсә, таяк тоткан әбиләр “җиппәрәләр” генә  урам буйлап. Урманда чаңгыда йөриләр”, - дип елмаештылар абыйлар. Авыллар картайса да, әле дәрт сүнмәгән. “Тик ни кызганыч, буш өйләр проблемасы безнең якларны да урап узмады, әти-әниләре якты дөньядан китә тора, өйләр бикләнә тора. Әшмән авылы бөтенләй бетте диярлек, Байрак авылында да гел олылар яши”, - диделәр борчылып.

Мондый авылларның язмышы киләчәктә нинди булыр?  Аларны нәрсә көтә? Гомумән, авылның киләчәге бармы? Менә шушы сораулар борчыды мине Ишкарда. Авылларга чыккан саен, мин аларны күзәтәм. Ул беркайчан да элекке кебек шаулап-гөрләп тормас инде. Күмәк хуҗалыкларның таркалуы, мәктәпләр ябылу, яшьләрнең шәһәрдә туплануы авылны кешесез калдырды. Шул ук вакытта элек шәһәргә китүчеләрнең кайберләре пенсиягә чыккач авылга кайтып төпләнә, аларның балалары җәй көне кайтып йөрү өчен булса да йорт төзи. Димәк, буыннар чылбыры дәвам итәр әле дигән өмет чаткысы бар. Мәчет-мәхәллә мәсьәләсе дә авылны, аның рухын, йолаларын саклауда үз ролен уйнарга тиеш. Мәчет тә авыл проблемаларыннан читтә калмасын, садака акчалары да изге эшкә – бабайлар мирасы булган авылыбызны саклауга, аның мәдәни кыйммәтләрен саклауга, шәкертләр укытуга тотылсын иде. Хөрмәтле муллаларыбызга алмаш кирәк, югыйсә яшь буын урысча сөйләшүгә күчеп, телебезне югалта барган кебек, динебезне дә югалтырбыз.

                     Эльвира Әсәдуллина. Автор фотосурәтләре.

Читайте нас: