Раббыңнан кичерүне өмет итеп

Соңгы вакытта тәүбә кылу һәм аны ничек башкару хакында аңлатуны сорап редакцияга берничә хат һәм мөрәҗәгать килде. Бу хакта җентекләп аңлату һәм тәүбә кылуның фазыйләтләре турында сөйләүне сорап, “Ихлас” мәчете каршындагы Вил Казыйханов исемендәге Бөтенрусия әхлак мәктәбе җитәкчесе Фатыйма Фаткуллинага мөрәҗәгать иттем.

Тәүбә кылучы гөнаһлары өчен эчтән үкенеп, соңыннан теле белән тәүбә кылырга һәм бу эшне кабатламаска тиеш.

Тәүбә-истигъфар кылуның фазыйләтләре күп. Пәйгамбәребез бу хакта шулай дигән: “Кем тәүбә-истигъфарны даими рәвештә әйтеп йөрсә, Аллаһу Тәгалә аңа сынау килгәндә төрле юлларын ачып җиңеллекләр тудыра, кайгырганда аны Үзе тынычландыра һәм хисапсыз җирләрдән ризык яудыра”.

“Сүбхәәнәллааһи вә бихәмдиһи әстагъфируллааһә вә әтүүбү иләйһи (көненә 100 тапкыр).

Әстагъфируллааһәль Газыыймәлләзии ләә иләәһә иләә Һүвәль Хәййүль Каййүүмү вә әтүүбү иләйһи (3 кат).

Сөекле Пәйгамбәребез Мөхәммәд (с.г.в.) тәүбә-истигъфар догаларының җитәкчесе булган бу дога хакында түбәндәгеләрне әйтте: “Кем бөтен күңеле белән ышанып һәм савабын өмет итеп шушы доганы иртә белән укыса һәм шул көнне вафат булса, җәннәткә керәчәк. Кем аны кичен укыса һәм таңга кадәр вафат булса, җәннәтле булачак”. (Бохари, Әбү, Дауд, Нәсаи, Тирмизи).

Көн саен тәүбә-истигъфар кылу өчен пәйгамбәребез шундый догаларны калдырды.

Бисмилләәһиррахмәәниррахиим.

Әлхәмдүлилләәһи Раббильгәәләмиин.

Аллааһүммә салли гәләә сәййидинәә Мүхәммәдин вә гәләә әәлиһии вә сахбиһии вә бәәрик вә сәллим.

Йәә Рабби йәә Аллааһ! Йәә Рабби йәә Рахмәән! Йәә Хәййү йәә Каййүүм! Йәә Әрхәмәрраахимиин!

Әй чиксез мәрхәмәтле Раббым Аллааһу вә Сүбхәнәһү вә Тәгалә! Мин Синең бәндәңмен һәм колыңмын! Син мине юктан бар иттең, тәрбия кылдың, чиксез нигъмәтләр белән чорнап алдың. Дөньяга килгәннән алып әлеге көнгә кадәр миңа биргән барча нигъмәтләреңә хисапсыз шөкерләремне белдерәм: “Син яралткан барлыклар, галәмдәге атомнар санынча Әлхәмдүлилләһ. Әлхәмдүлилләһи Раббильгәәләмиин”.

Син җирдә яшәүче кешеләрне һәм җеннәрне Үзеңә гыйбадәт кылу өчен яралттың. Синең барлыгыңа һәм берлегеңә чын күңелемнән инанып, иманымны яңартам. Синнән башка табыныр Зат юк, бөтен гыйбадәтләргә бары тик Син генә лаексың. Мүхәммәд саллләллааһу гәләйһи вәсәлләм Синең колың һәм динне өйрәтү өчен җибәрелгән илчең. “Әшһәдү ән ләәәә иләәһә илләллааһу вә әшһәдү әннә Мүхәммәдән гәбдүһү вә расүүлүһ” (3 тапкыр).

Әй гөнаһларны гафу итүче, шәфкатьле Раббым! Мин туганнан алып әлегә кадәр кылган бөтен гөнаһларым өчен чын күңелемнән үкенеп, Синең алдыңда тәүбә кылам. Минем белеп һәм белмичә, аңлап һәм аңламыйча, ачык һәм яшерен кылган бөтен гөнаһларымны Үзеңнең киң рәхмәтең белән кичер, гафу ит. Калебемне бөтен гөнаһлардан пакъларга, чистарынырга, Сиңа якынаерга, Үзең кушканнарны үтәп, тыйганнарыңнан тыелып яшәргә бөтен ярдәмнәреңне бир. Наданлыкта, Сиңа тиешле гыйбадәт кылмыйча яшәгән елларым өчен тирән үкенеп, Сиңа әйләнеп кайттым.

Син Үзеңнең Коръән Кәримеңдә: “Кем үзенең гөнаһларына үкенеп, Аллаһка тәүбә-истигъфар кылса, Аллаһу Тәгаләне гафу итүче итеп табар”, - дигәнсең. Мин Үземнең бөтен начар уйларым һәм эшләрем, кылган гөнаһларым өчен тирән үкенгән хәлдә Синнән ялварып сорыймын: әлегә чаклы кылган гөнаһлы гамәлләремнең барчасын да кичер, гафу ит, аларны башкача кылмаска, Син кушканча гыйдабәт кылып яшәргә насыйп ит. Тормыш иптәшем, балаларым белән Сиңа шөкерләр кылып яшәү өчен җиңеллекләр бир. Ике дөнья бәхет-сәгадәтләренә ирешү өчен гыйлем-гыйбадәт, бәрәкәт ишекләреңне ач.

Әй Мәрхәмәтле Аллааһ! Җир шарындагы бөтен бәндәләреңә иманга килергә, тәүбәләр кылырга ярдәмнәреңне бир. Барча иманлы колларыңның бөтен гөнаһларын һәм кимчелекләрен гафу ит. Сөекле рәсүлебез Мүхәммәд салләллааһу гәләйһи вәсәлләм үрнәгендә яшәргә, Аның үрнәгендә тәрбияләнергә, Коръән һәм Сөннәт буенча гомер итәргә бөтен ярдәмнәреңне бир. Халыклар арасына дуслык бир. Илләребезгә тынычлык бир. Җир галәме халыкларына тәүфикъ һидәяте ишекләреңне ач. Әәмин!

Әлхәмдүлиләәһи Раббиль гәәләмиин. Аллааһүммә салли гәләә сәййидинәә Мүхәммәдин вә гәләә әәлиһи вә сахбиһии вә бәәрик вә сәллим.