Табиб дәваханәдә 78 кешегә коронавирус йоктырган

Беренчел мәгълүматлар буенча, инфекция таралу чыганагы — дәваханәдә эшләгән табиб. Ул коронавирусны күршесеннән йоктырган, ди.

Куйвашев пациентларның күбесендә чир билгеләре юк дип белдерә, алар үзләрен яхшы хис итә, гомумән ситуация “контрольдә”, ди губернатор.

Шулай итеп, 18 апрельдә Екатеринбургның 1 санлы дәваханәсендә карантин кертелгән. Свердловск өлкәсенең коронавирус белән көрәш буенча оператив штабта хәбәр итүләренчә, берничә пациентны һәм элемтәдә булган табибларны 40 санлы дәваханәнең йогышлы авырулар бүлегенә госпитализацияләгәннәр.

Соңгы мәгълүматлар буенча, Русиядә коронавирустан барлыгы 405 кеше үлгән, ә таҗлы чирне йоктыручылар саны 47 мең кешедән артып киткән.