Күтәрә алмас авыр бер таш булып күңелләргә ятты бу сугыш...

Күңелем һаман салкын кышларда

Ямьле җәйләр җитте, ә күңелем

Калган төсле һаман кышларда,

Сагышларга тулы күңелемне

Ача алмый сайрар кошлар да.

Шатлансам да, әче тәм бар кебек,

Тулы төсле түгел шатлыгым.

Ә югыйсә, шушы яшькә җиткәч,

Шатланырга мин бит хаклымын.

Күтәрәлмәс авыр бер таш булып

Күңелләргә ятты бу сугыш,

Шомга салды, сары төскә керде

Матур гына аккан көн, тормыш.

Каһәрләгән сугыш һич аямый

– Күпме япь-яшь җаннар кыела,

Ятим калганнарның йөрәгенә

Төзәлмәслек яра уела.

Күпме аналарның күңел-йөрәкләре, Бәгырьләре бүген өзелә, 

Озын төннәр буе сабыен уйлап

Йокы кунмый алар күзенә.

Инде Ходаем, бу ачы сугышны

Туктатырга бир бер чарасын,

Һәрбер ана, исән-саулар килеш

Көтеп алсын газиз баласын.

Июнь 2023. Рафаэль Бикмурзин.