Киштәдә яңа китап

З.Биишева исемендәге Башкортстан "Китап" нәшриятында "Офык яктысы" дип исемләнгән татар телендәге яңа китап чыкты. Анда дүрт авторның – Рәсим Шәфи-Рәхмәт, Фатыйх Сәйфран, Зәйфә Салихова һәм Руслан Сөләйманов – әсәрләре урын алды. Талантлы каләм ияләренең иҗат җимешләреннән авыз итәргә ашыгыгыз, дуслар!

ГӨЛЛӘР

Гөлләр кешеләргә охшаш:

Алар да төрле-төрле.

Эзләсәң дә, табып булмый

Бертөрле ике гөлне.

Безгә охшап, алар да бит

Бер холыклы түгелләр.

Бар ятып үсүче гөл, бар

Үрмәли торган гөлләр.

Берсе – кыска, берсе – озын.

Төрле-төрле төслеләр.

Кайсы – иркә, кайсылары

Карны тишә: көчлеләр.

Аларга да, яшәр өчен

Яктылык кирәк гелән.

Гомер буе көрәшәләр

Чүп үләннәре белән.

Һәр гөлдә бар кешеләргә

Охшашлык билгеләре.

Бар гөлләрнең назлылары,

Бар чәнечкелеләре.

Гөлләр кешеләргә охшаш:

Хас та безнең ишеләр.

Аһ, әгәр дә шул гөлләргә

Охшасалар кешеләр...

Рәсим Шәфи-Рәхмәт.