Барлык яңалыклар
Әдәбият
7 декабрь 2017, 11:44

Әзер җаваплар

– Аңладыңмы?– Аңлавын аңладым, төшенә генә алмадым. – Ә мин нишлим?– Ни теләсәң, шуны эшлә, тешең булса, телең тешлә.

– Аңладыңмы?
– Аңлавын аңладым, төшенә генә алмадым.
– Ә мин нишлим?
– Ни теләсәң, шуны эшлә, тешең булса, телең тешлә.
– Белдеңме?
– Белдем, колагыма элдем, берсеннән керде, берсеннән чыгып китте.
– Булдымы?
– Булды дигәндә койрыгын борды.
– Бушлаймы?
– Бушлай сыер гына мышнай.
– Бүген ничәсе?
– Кадер кичәсе.
– Бүген ялдамы әллә?
– Ялда да, койрыкта да.
– Дәлеше?
– Дәлеше кабак бәлеше.
– Иеме?
– Ие, иемәсәң бие.
– Исәнме?
– Исән булмасам, әллә син врачмы?
– Исәнме?
– Ә үзең кисәүме?
– Ишетмәдем, ни дисең?
– Базарда колак саталар, ди. Барып ал дим.
– Кайда?
– Былтыргы кар астында.
– Кайда?
– Каербидә.
– Кайдан килдең?
– Кайдырмый тау астыннан.
– Кем?
– Каян белим, кулын куеп китмәгән.
– Кем?
– Кем дигәннең кече улы.
– Кем?
– Кем дигәннең үзе, маңгаенда ике күзе.
– Кем малае син?
– Кемән улы Кемәнетдин малае.
– Кыйммәтме?
– Акча белән башма-баш.
– Мәгънәсе?
– Мәгънәсе – капка баганасы.
– Ни булган?
– Пешкән шалкан чи булган.
– Ни хак?
– Хак ярым хак, пот ярым борчак, бер кием чабата, калганы акчалата.
– Нигә карыйсың?
– Күңелемә ярыйсың.
– Ник?
– Син ни әйтер икән дип.
– Ник чәй эчмисең?
– Чәй белән кытай битен юа, ди.
– Нихәл?
– Сине күргәч, бетте хәл.
– Нихәл?
– Хәл иминлек, акча меңлек, алыштырырга вак юк.
– Нихәл?
– Хәл йөзгә җитә, кул тезгә җитә.
– Нихәл?
– Хәл хәер, ярлы баер, бай бөләр, иманасын кем түләр?
– Ни хәл?
– Шөкер дигән көн бар, бер салмалык он бар.
– Нихәл?
– Хәл хәлвәт, киндер күлмәк, ыштан бурлат, киткәннәр урлап.