Башкортстан волонтерлары чираттагы гуманитар миссиясен тәмамлады

Башкортстан волонтерлары Якутия һәм Краснодар крае волонтерлары белән бергә Донбасста гуманитар миссияне тәмамлады.

Халык фронты яшьләре Дондагы Ростов һәм яңа регионнарда быел беренче тапкыр гуманитар миссия сменасы эшенә нәтиҗә ясады: ике атна, 18 волонтер, МХО сугышчыларына 55 тонна йөк, Донбасс халкына адреслы ярдәм һәм башкалар.

Җыелма төркемдә Башкортстан, Якутия һәм Краснодар краеннан волонтерлар катнашты.

– Безнең команда һәрвакыт беренчеләрдән булып гуманитар миссияләргә чыгарга омтыла. Башкортстан волонтерлары Курск һәм Ростов өлкәләрендә, Донецк Халык Республикасында, Луганск Халык Республикасында ярдәм иттеләр. Бу юлы без ике складта зур күләмдә эш башкардык: әйберләр тупладык, азык-төлек җыелмаларын җыйдык, аларны халыкка һәм МХО сугышчыларына җибәрдек, – диде Башкортстандагы Халык фронты яшьләре координаторы Рөстәм Сәлахетдинов.

Ростов складында ике атна эшләү дәверендә волонтерлар МХО сугышчылары өчен 55 тонна йөк эшкәрткәннәр, 2,5 меңгә якын текстиль эшләнмәләрен сортларга аерганнар, азык-төлек, кием-салым, йорт кирәк-яраклары һәм канцелярия кирәк-яракларын кертеп, меңнәрчә берәмлек ярдәм әзерләгәннәр.

Донецкта волонтерлар канцелярия кирәк-яракларын сортларга аерганнар һәм 620дән артык азык-төлек җыелмасын җыйганнар. Аларның бер өлешен мохтаҗ гаиләләргә илткәннәр.

Мәсәлән, егетләр азык-төлек җыелмасын ДНРның фронт яны районыннан эвакуацияләнгән Татьяна Шпичкага тапшырганнар.

“Күчүчеләргә хәзер бик авыр. Безгә бабай белән 75 яшь, без барысын да югалттык. Артемовскида яшәдек, йорт та, фатир да бар иде, ә хәзер бернәрсә дә калмады. Торак арендалыйбыз. Сезгә ярдәмегез өчен зур рәхмәт”, – дип, рәхмәтен белдергән хатын.

Макеевкада волонтерлар госпиталь хезмәткәрләренә, табибларына һәм пациентларына булышканнар.

Эштән тыш, миссиядә катнашучылар Донбасс тарихы белән танышканнар.