Кояш чәчәге

Хризантема белән Кояш японнар өчен аерылгысыз төшенчә. Чөнки япон телендә бу сүзләр — омонимнар, алар бертөрле яңгырый - "кику" һәм бер иероглиф белән языла. Шулай итеп, Япониянең төп чәчәге яктырткыч исеме белән аталган, риваять буенча, япон халкы үз тарихын шуннан башлана дип саный.

 Дәүләт символы

Хризантемага һәм дәүләт символикасына шактый дәрәҗәле урын бирелгән. VII гасырдан, хризантема рәсеме Микадо кылычын бизәгәннән соң, ул Япон императорларының эмблемасы булып санала. Уналты икеләтә катлы таҗлы алтынсу стильле чәчәк хәзер дә Император йортының гербы булып кала, ә кайчакта тәңкәләрдә, мөһерләрдә һәм рәсми документларда дәүләт гербы ролен дә үти . Хризантеманың нәкъ менә шундый сурәте изге саналган, аңа, аерым алганда, 16-таҗ яфраклы чәчәк рәсеме белән кием кию хокукы бары тик император фамилиясе әгъзаларына гына бирелгән. Бу тәртипне бозган гади японнарга үлем җәзасы яный.

Шундый ук хризантема 1888 елда гамәлгә куелган һәм бүгенге көнгә кадәр илнең иң югары һәм иң мактаулы бүләге саналган Хризантема орденында да бар.

Японнар өчен Кояш чәчәге — металлда катып калган символ гына түгел. Бу үсемлек Япониядә мәхәббәт һәм зур тәрбия белән чолгап алынган. Хризантемаларны сәнәгать дәрәҗәсендә үрчетүдә, формалары һәм төсләре төрле булган яңа сортлар ясауда японнарга тиңнәр юк. Күрәсең, озак чәчәк ату чоры аркасында хризантема бәхет һәм озын гомерлелекне гәүдәләндерә. Хризантемадан җыелган чык гомерне озайта дигән ышану бар.

Шундый күркәм традиция дә әле дә яши: 831 елдан башлап Япониядә хризантема бәйрәме билгеләнә. Ул - японнарның иң матур һәм яраткан бәйрәмнәренең берсе һәм ел саен көз мәлендә үткәрелә. Элекке заманда исә ай календаре буенча тугызынчы айның тугызынчы көнендә сарай кешеләре император сараена чакырылганнар, "хризантема" шәрабы эчкәннәр, музыка тыңлаганнар, хризантемаларга сокланганнар һәм шигырьләр багышлаганнар.

Әле дә Япония башкаласында һәм башка шәһәрләрендә бу кояш чәчәкләренең фестивальләре һәм күргәзмәләре үтә, алардан композицияләр ясау өчен үсемлекләрнең сафлыгын мөмкин кадәр озаграк саклау өчен, тамыры белән алалар.

Ә Япониянең иң эре чәчәк үрчетү үзәкләренең берсе булган Нихонмацу шәһәрендә көз җитү белән хризантема курчаклары күргәзмәсе оештырыла. Кеше буе фигураларының нигезен бамбуктан, йөзен, кулларын һәм аякларын — папье-машедан ясыйлар, ә костюмнарны төрле төсләрдәге хризантемалардан «тегәләр». Бәйрәмдә, борынгы заманнардагы кебек үк, хризантема эчемлеген татып карарга була. Аны шифалы һәм тәмле, диләр. Фото: news.cgtn.com sitella.livejournal.com