Теге дөньядан әйләнеп кайткан

Эмбер Кавано исемле хатын баш миенә кан саву (инсульт) аркасында теге дөньяга эләгүе һәм авыр карар кабул итүе турында сөйләгән. Бу хакта "Дели Майл" басмасы язып чыккан.
2021 елның декабрендә Каваноның башына ике тапкыр кан сауган. Табиблар аның баш миенә зур зыян килүе турында белдергән, яшәвен шик астына алган, әмма шулай да аны ашыгыч рәвештә вертолетта махсус дәваханәгә илткәннәр. Соңыннан Кавано вертолетта үлеләр дөньясына эләгүе турында сөйләгән.
Сөйләвенчә, ул кояш нурына чумган чәчәк бакчасына эләккән. Анда чатыр торган, якында аның йорт хайваннары һәм якын кешеләре йөргән. Миңа 25 яшь чамасы иде һәм миндә картаю билгеләре юк иде дигән Кавано.
"Үләндә басып торганда һәр үсемлекне, һәр үләнне, һәр су тамчысын, молекуланы бөтен барлыгым-җисемем белән тойдым, тирә-якта илаһи нур балкый иде", -дип тасвирлаган Эмбер "күргәннәрен". Ул бакчада читтән ниндидер тәнкыйть яисә соклану хисләре сизмәгән. Шуннан соң ул кешеләрне теге дөньяда җәза да, бүләкләү дә көтми дип саный башлаган.
Ул үлеләр дөньясында рухи остазлар белән танышуын да әйткән. Алар телепатия ярдәмендә аңлашкан. Остазлар хатынга яшәүгә кире әйләнеп кайту яки биредә мәңгелеккә калу буенча сайлау мөмкинлеге бар дигәннәр. Гаиләсе өчен борчылган хатын әйләнеп кайтырга карар иткән.
Табиблар аның "әйләнеп" кайтуын могҗиза дип атаган. Баш мие каты зарарлану сәбәпле ул йөрү һәм сөйләшә алу мөмкинлекләреннән мәхрүм калырга тиеш булган. Ләкин организмның ул функцияләре янәдән эшли башлаган.
Хатын теге дөньяда булуын исбат итә алмавын, әмма әйткәннәреннән ваз кичмәячәген белдергән. "Алар мине тормышыма караганда чынрак, реальрәк иде",- ди ул.
Бөек Британиянең Ноттингем шәһәрендә 65 яшендә йөрәк өянәге кичергән ир дә теге дөньяга сәяхәте, гүзәл бакчада булуы, анда туган-тумачаларын күрүен сөйләгән.
Кызык, мондый хәлләрне сөйләүчеләр бик күп. Нәрсәне аңлата бу? Сез ни уйлыйсыз?

Фото: tritonstroy.ru