Елмаерга бер сәбәп

Төнге сәгать өч. Ишектә кыңгырау чыңлый. Ир мыгырдана-мыгырдана барып ишекне ача – ә анда бер исерек.

-Гафу, борчыйсым килмәгән иде. Мужик, әйдә әле минем белән. Тышта этеп кенә җибәр әле, ә!

-Син нәрсә?? Төн уртасы! Бар урамда берәрсен туктатып сора!

Ир кире караватына килеп ята. Хатыны:

-Кем иде ул?

-Әй, бер исерек. Этеп кенә җибәр әле, ди.

-Ә син этмәдеңме? Эчеңдә җаның бармы синең? Исеңдәме, безнең машинаның моторы сүнеп, туктагач, ниндидер таныш түгел егет яңгыр астында безгә машина этеште... Ә син?!

Ир тагын мыгырдана-мыгырдана чыгып китә. Дөм караңгы, суык...

-Әй, мужик, кайда син?

Караңгыдан тавыш ишетелә:

-Монда мин! Атынгычта!

**

–Көн саен ничә сәгать йоклыйсыз?– дип сорый табиб.
–Ике белән өч арасында йоклап алам.
–Бу бик аз бит!
–Миңа җитә. Төнлә дә йоклыйм бит әле.

**

– Мин сер саклый беләм! Тик менә мин ул серне сөйләгән кешеләр генә аны саклый белми!
**
–Син нигә мине “Вконтакте”да дуслар исемлегеннән алып ташладың?
–Әй, ачуымны китерәсең!
–Ә безнең өйләнешкән булуыбыз ачуыңны китермиме алай?
**
–Улым, өйгә эш күп бирделәрме?
–Уууу, әни, анда сиңа кычкырасы да кычкырасы бүген!
**
–Сезнең хобби?
–Кулинария.
–Пешерәсезме?
–Ашыйм!
**
Бу дөньяда камил бернәрсә дә юк. Хәтта тулы тилегә дә бераз җитешми.

**

Горурлыгыннан нишләргә белмәгән ата кеше редакциягә шалтыратып, хатынының өч игезәк табуы турында хәбәр итә. Теге башта ишетеп бетермиләр:
– Тагын кабатлый алмассызмы?
– Юк инде! Болары да менә моннан җиткән!