Гагарин кочаклаган Мадрил

Мадрил  кухня аша үтеп, Гагарин каршына килеп баса.

Бүген Коcмонавтика көне! Ул тарихи вакыйга, беренче космонавт Юрий  Гагарин инде риваять-легендаларга керде. Үз илендә пәйгамбәр булмый, дисәләр дә, Гагарин  кочагын татыган,  90ынчы яшен куучы  герой яши безнең арабызда.  Менә ул тарих:

Мадрил Гафуров Бөтенсоюз студент төзелеш отрядларының беренче слетында була. Яшьләр “Юность” кунакханәсенең ресторанында утыра. Шулчак, кемдер йөгереп килеп, “Гагарин!” дип аваз сала. Бар да бердәнбер ишеккә ябырыла, ә Мадрил  кухня аша үтеп, Гагарин каршына килеп баса. Гагарин аны кайдан булуын сорый:

• Комаров мине сезгә чакырган иде. Анда атаклы мәгарәләр бар бит. Бәлки, күрешербез дә, – ди атаклы комонавт.

Мадрил аңа:

• Без, бәлки, күрешкәнбездер ул, Юрий Алексеевич, – ди.
• Ничек? – дип сорый Гагарин.
• Чкалов авиация училищесына бер чорда имтиханнар бирдек. Катапульттан җайсыз төшкәч, мине алмадылар, – ди Мадрил.

Инде халык та җыелып китә... Юрий Гагарин, Мадрилның кулын кысып, иңеннән кочаклый да:

• Бу егет безнең буыннан, – дип, җыелганнарны көнләшүле аптырауда калдыра.

Бу очрашуның истәлеген – космонавт автографын  – бик кадерләп саклый Гагарин яшьтәше Мадрил ага Гафуров. Мадрил – кояш улы дигән сүз, димәк, космонавт кояш улын кочаклый...