Ленин исемендәге парк заманча сулыш алды

Бүген, 9 октябрьдә, Уфада Республика көне алдыннан зур реконструкциядән соң Ленин исемендәге парк ачылды. Тантанада Башкортстан Башлыгы Радий Хәбиров, Саклык банкы президенты һәм идарә рәисе Герман Греф һәм башка рәсми вәкилләр катнашты.

Радий Хәбиров һәм Герман Греф паркның яңартылган урыннарын – балалар һәм спорт мәйданчыкларын, амфитеатр, реконструкцияләнгән фонтаннарны карадылар. Алар килгән вакытта Рим Хәсәновның атаклы “Кышкы романс” композициясе яңгырый иде.

Уфадагы Ленин исемендәге парк (күпләр аны Матросов паркы дип белә) – шәһәрнең иң борынгы һәм иң әһәмиятле паркларының берсе. Аның тарихы – бер ярым гасырдан артык. 2025-2026 елларда биредә масштаблы реконструкция үткәрелде, аның барышында тарихи планлаштыру һәм мемориаль өлеш сакланып калды, ләкин өслекләр, фонтаннар, яктырту корылмалары яңартылды һәм заманча ял итү зоналары өстәлде. Паркта инженерлык челтәрләре, электр һәм су белән тәэмин итү тулысынча алыштырылган. Заманча видеокүзәтү камералары һәм тамчылап су сибү системасы урнаштырылган. 18 мең берәмлектән артык яңа брусчатка салынган. Шәһәр бәйрәмнәре өчен сәхнәле амфитеатр төзелгән. Билгеле фонтаннарны тергезгәннәр, хәзер алар суыкларга кадәр көн саен эшләячәк, яктылык һәм тавыш эффектлары белән тулыланачак.

Иҗтимагый территорияне төзекләндерү “Тормыш өчен инфраструктура” милли проектының “Уңайлы шәһәр мохитен формалаштыру” федераль программасында катнашу нәтиҗәсендә, шулай ук Сбербанк ярдәмендә башкарылган.

Парк ачылу көнендә зур бәйрәм программасы булды. Тамашачылар Zainetdin этно-шоуын, “Голос” тамашасында катнашучы Илдар Абдуллин һәм Назгөл Отузова чыгышларын, балалар хорларын һәм бию коллективларын карады.

Сез дә барып күрегез. Йөз тапкыр укыганчы, бер барып күрү хәерле.