Уфада «Кеше эзлим» хәйрия акциясе булды

Шәһәр мэры Ратмир Мәүлиев «Кеше эзлим» акциясенең беренче тапкыр 2024 елның декабрендә Башкортстан урманчылары исемендәге паркта старт алуы турында сөйләде. Шул вакыттан бирле мондый 12 чара узган инде, шуның нәтиҗәсендә 271 эт һәм өч песи баласы яңа хуҗалар тапкан. Моннан тыш, хәйриячеләр 18 тонна азык сатып алганнар.

Быел акция мәйданчыгында уфалылар һәм шәһәр кунаклары хайваннар өчен приютлар белән таныша алдылар, иганә җыюда катнаштылар, йорт мәчеләрен һәм этләрен тоту мәсьәләләре буенча ветеринарлардан һөнәри консультацияләр алдылар, аларга бушлай вакцинация ясадылар.

Башкортстан Башлыгы «Изгелек тартмасы» акциясендә катнашты, приютларның берсенә эт азыгы сатып алып бирде. Радий Хәбиров шулай ук мондый учреждениеләр вәкилләре белән йортсыз этләрне һәм мәчеләрне тоту шартлары, профильле коммерцияле булмаган оешмаларны үстерү перспективалары турында фикер алышты.

“Койрыклы йорт” йортсыз хайваннарга ярдәм итү һәм тернәкләндерү үзәге җитәкчесе Юлиана Гафарова Благовещен районында тематик парк белән туристик тернәкләндерү комплексы төзү проекты турында сөйләде. Төп бурыч: хайваннар белән аралашу ярдәмендә авыр тормыш хәлендә калган кешеләргә ярдәм итү. Шулай ук проект инициаторлары браконьерлар кулыннан зыян күргән кыргый җәнлекләрне коткарырга һәм тәрбияләргә планлаштыралар. Радий Хәбиров Юлиана Гафарованы якындагы «инвестиция сәгате»нә чакырды.

Фотограф Мария Моисеева «Без – көтүнең бер өлеше» күргәзмәсен тәкъдим итте. Ул йорт хайваннарыннан башка үз тормышларын күз алдына китерә алмаган гаиләләр өчен фотосессияләр үткәрүен билгеләп үтте.

Уфа шәһәре ветеринария станциясе башлыгы Андрей Белов акция кысаларында ветеринарларның йорт хайваннарын вируслы авыруларга, шул исәптән котыру авыруларына каршы вакцинацияләүнең мөһимлеге турында халыкка хәбәр итүләре турында сөйләде. Бу чаралар хайваннарга карата җаваплы мөнәсәбәтнең аерылгысыз өлеше булып тора һәм хайваннарның үзләре һәм аларның хуҗалары өчен җитди нәтиҗәләрне булдырмый калырга мөмкинлек бирә. Вакытында вакцинация алдагы дәвалауга караганда күпкә арзанрак һәм нәтиҗәлерәк бит.

Радий Фәрит улы журналистлар белән әңгәмәдә акциядә булган тәэсирләре белән уртаклашты.

- Әлбәттә, хайваннарны өйдә тоту - зур җаваплылык ул. Кызганычка каршы, моны барысы да аңламый, нәтиҗәдә мәчеләр һәм этләр кайвакыт урамда кала, - диде төбәк җитәкчесе. – Уфада, республикада йортсыз йорт хайваннарына ярдәм итәргә әзер булган битараф булмаган кешеләрнең бик көчле берләшмәсе булуы сөендерә. Бу юнәлешкә өстәмә энергия бирергә тырышачакбыз, шул исәптән социаль проектларга дәүләт ярдәме чаралары аша да.

Фото: БР Башлыгының рәсми порталы.