Юл һаләкәтләре саны кимегән

4 февральдә Республика йортында Башкортстан Башлыгы Радий Хәбиров чираттагы «Транспорт сәгатен» үткәрде. Көн тәртибендә - төбәкнең юл челтәрен модернизацияләү мәсьәләләре.

«Урал буе» юллар идарәсе башлыгы вазыйфасын башкаручы Дмитрий Горб республика территориясе буенча уза торган федераль трассалардагы эшләрнең төп нәтиҗәләре турында сөйләде.

Мондый участокларның гомуми озынлыгы - 795,4 км.

- Норматив таләпләргә туры килә торган юллар өлеше 2025 елда 79 проценттан 88 процентка кадәр артты. Бу трассаларда аварияләр саны кимүгә китерде, - дип билгеләде Дмитрий Горб.

Әйтик, 2025 елда федераль автомобиль юлларында юл-транспорт һәлакәтләре саны 23,9 процентка, ә зыян күрүчеләр саны 22,9 процентка кимегән. Моннан тыш, юл-транспорт һәлакәтендә үлүчеләр саны 18,3 процентка кимегән. Федераль трассалар участокларын модернизацияләү эшләре 2026 елда да дәвам итәчәк. Планда-19 км юлны, шулай ук 20 күперне ремонтлау.

Башкортстанда гамәлгә ашырыла торган эре проектлар арасында – М-5 һәм Р-240 трассалары участокларын реконструкцияләү, дүрт һәм аннан да күбрәк хәрәкәт полосаларын киңәйтү. Сүз шул исәптән Стәрлетамак агломерациясен әйләнеп узуны модернизацияләү турында бара, аны 2026 елда төгәлләргә тиешләр.