Февраль ничек башлана?

Кыш уртасы. Кимен куймас!

Башгидромет белгечләре, Русия Гидрометүзәге мәгълүматларына нигезләнеп, февральдә республикада нинди һава торышы булырына фаразлар ясады.

"Февральдә уртача һава температурасы төбәктә нормага якын (норма -11,7 градус) көтелә. Айлык явым-төшем дә нормага якын булыр дип көтелә (норма 20-40 мм)», - диелә синоптиклар хәбәрендә.

Шул ук вакытта бүген республиканың төньяк яртысында кар, көндез урыны белән көчле буран, бозлавык, юлларда кар көртләре, сырынтылар, бозлавык булу ихтимал. Башкортстанның көньяк яртысында явым-төшем юк.

Җил көньяктан, көньяк-көнбатыштан уртача, урыны белән көчле. Көндез температура -3, -8 градус.

Шимбә, 31 гыйнварда, республиканың төньяк яртысында янә кар явачак, урыны белән буран, бозлавык, юлларда кар көртләре, сырынтылар, бозлавык хасил булыр.

Көньяк яртысында сизелерлек явым-төшем юк. Көньяк чиректә җил уртача, урыны белән кискен. Төнлә -6, -11 градус, аязытканда -16, көндез -3, -8 градус.

Якшәмбе, 1 февральдә, урыны белән бераз кар явачак, төньяк-көнбатышта уртача кар явачак. Көньяк чиректә җил уртача, урыны белән кискен. Төнлә -6, -11 градус, аязытканда — 16, көндез -3, -8 градус.