Миңнегаян әбигә 104 яшь тулган!

Чишмәдә яшәүче Миңнегаян Вәлиевага 104 яшь тулган. Аны хакимият башлыгы Ришат Мансуров шәхсән үзе килеп котлаган.

Миңнегаян Абдулнәгыйм кызы Благовар районында туган, зур гаиләдә үскән. Балачагы җиңел булмаган, кечкенә чагында ук аңа тормыш авырлыклары белән очрашырга туры килә. Әнисе фаҗигале рәвештә үлә, ә әтисен кулаклар кулына тапшыралар, бөтен хуҗалыкны, йортны һәм каралты-кураларны тартып алалар. Әмма әтисе көчле ихтыярлы кеше була, ул бирешми. Землянка казый һәм алар анда 10 ел яшиләр. Ачлык, салкын һәм авырлыклар үзәкләрен өзә...

Әбинең яшьлеге исә Бөек Ватан сугышының кырыс елларына туры килә. Ул элеваторда йөк ташучы булып эшли, мич ягу өчен торф ясый, тимер юлда да эшли, юллар салуда катнаша.

25 яшендә кияүгә чыга, өч бала – ике ул һәм бер кызга гомер бүләк итә. Хәзер алар барысы да әниләре янәшәсендә Чишмәдә яшиләр. Миңнегаян әби, оныклары һәм оныкчыклары уңышларына сөенеп, ил-көнгә тынычлык тели.

“104 яшь – бу сан гына түгел. Бу – бер кеше үз күзләре белән күргән тулы бер чор. Үзенең яшенә карамастан, Миңнегаян Абдулнәгыйм кызы күңел күтәренкелеген саклап кала, ә гомере буена туплаган зирәклеген оныкларына, оныкчыкларына тапшыра”, – ди Ришат Мансуров.