12 муниципалитетта 35 мәктәп бинасы тәртипкә китерелгән

29 декабрьдә Башкортстан Башлыгы Радий Хәбиров үткәргән атналык оператив киңәшмәдә 2025 елда мәгариф системасын модернизацияләү нәтиҗәләре һәм киләчәк чорга планнар каралды.

Республика Хөкүмәте Премьер-министрының беренче урынбасары Урал Кильсенбаев хәбәр иткәнчә, федераль программаларда катнашу һәм республика һәм муниципаль дәрәҗәдә җайга салынган эш нәтиҗәсендә 39 мәгариф оешмасы капиталь ремонтланган. Әйтик, «Яшьләр һәм балалар» милли проекты буенча 2025 елда 12 муниципалитетта 35 гомуми белем бирү мәктәбе бинасын тәртипкә китергәннәр. Иң күп эш Бөре районында, шулай ук Стәрлетамакта һәм Салаватта башкарылган.

Моннан тыш, төбәкнең уку йортларында җиһазларны масштаблы яңарту үткәрелде. «Хезмәт (технология)» һәм «Ватанны саклау һәм иминлек нигезләре» предметлары буенча заманча комплектлар белән 711 мәктәп җиһазландырылган.

Урта һөнәри белем бирү системасын үстерүгә аерым игътибар бирелде. «Профессионалитет» проекты кысаларында Уфада Салават мәгариф һәм һөнәри технологияләр көллиятен, шулай ук Башкортстанның эретеп ябыштыру-монтаж һәм сәнәгать җитештерүе көллиятен ремонтлаганнар һәм заманча җиһазлар белән тәэмин иткәннәр. 2025 елда республикада урта һөнәри белем бирү системасында биш яңа тармак кластеры төзелде. Шулай итеп, 2022 елдан Башкортстанда 19 кластер формалаштырылды, бу төбәккә бу юнәлеш буенча илдә алдынгы урыннарга чыгарга мөмкинлек бирде.