Юл картасына кул куелды

Русия-Үзбәкстан хөкүмәтара комиссиясе утырышында Үзбәкстан һәм Башкортстан регионнары арасында хезмәттәшлекне үстерү буенча юл картасына кул куелды .

3 декабрь-Ташкентта (Үзбәкстан) Башкортстан Башлыгы Радий Хәбиров Үзбәкстан Республикасы һәм Русия Федерациясе арасында икътисадый хезмәттәшлек буенча Хөкүмәтара комиссиянең 26 нчы утырышында катнашты. Аны Русия Хөкүмәте рәисенең беренче урынбасары Денис Мантуров һәм Үзбәкстан Премьер-министры урынбасары Җәмшид Ходжаев үткәрде.

Утырышта катнашучылар билгеләп үткәнчә, 2024 ел нәтиҗәләре буенча Русия һәм Үзбәкстан арасында товар әйләнеше биш процентка арткан, 10 млрд доллардан артып киткән. 2025 елның тугыз аенда үзара сәүдә күләме тагын сигез процентка арткан. Экспортта да, импортта да уңай динамика сизелә.

- Безнең илләрнең инвестицион хезмәттәшлеге дә шундый ук уңай юнәлештә үсә. Республикада Русия катнашлыгында 3 меңнән артык предприятие эшли – бу Үзбәкстанда тәкъдим ителгән чит ил капиталы булган барлык компанияләрнең 20 процентка якыны, - дип билгеләде Денис Мантуров. Мәдәни-гуманитар элемтәләрне үстерү, уртак конгресс-күргәзмә чараларын уздыру Россия белән Үзбәкстан арасында һәрьяклы хезмәттәшлекне ныгытуга ярдәм итә.

Утырыш йомгаклары буенча Җәмшид Ходжаев һәм Радий Хәбиров Денис Мантуров барында Үзбәкстан һәм Башкортстан регионнары арасында сәүдә-икътисадый хезмәттәшлекне үстерү буенча юл картасын имзаладылар. Документ сәнәгать кооперациясе һәм инвестиция сәясәте өлешендә, АПК, сәүдә, туризм, мәгариф, мәдәният, спорт өлкәләрендә һәм башка юнәлешләр буенча хезмәттәшлекне киңәйтүне күздә тота. Шунысын да билгеләп үтәргә кирәк, Үзбәкстан Башкортстанның тышкы сәүдә әйләнешендә 4,2 процент өлеше белән җиденче урында тора. 2024 ел нәтиҗәләре буенча ул 16,7 процентка үсеш белән 197,9 млн доллар тәшкил иткән.