Сибай 70 еллыгын билгеләп үтте: Урал аръягы башкаласы киләчәккә ышанычлы карый

Назаров әйтүенчә, Сибай халкы нигез салган тау эшчеләре турындагы истәлекләрне кадерләп саклый. Чиксез далалар арасында шахтерлар бистәсеннән үскән шәһәр - тау сәнәгате символына әверелде.

Премьер-министр тау-баету комбинатын төзүдә һәм үстерүдә катнашкан барлык буыннарга да, шулай ук Сибай халкына да тирән ихтирамын белдерде. Аның сүзләренчә, нәкъ менә аларның намуслы хезмәте нәтиҗәсендә бүген шәһәр төбәкнең заманча сәнәгать һәм мәдәни үзәге булып тора.

Андрей Назаров белдергәнчә, бәйрәмнең Бөтенрусия инвестицион Сабан туен уздыру белән туры килүе бәйрәм итүгә аеруча символик мәгънә бирә. VII тапкыр узучы форум Русия Федерациясенең 28 субъектыннан һәм 10 чит ил дәүләтеннән ике меңнән артык катнашучыны берләштерде. Ул билгеләп үткәнчә, бу Сибайның инвесторларны һәм эшлекле бергәлекне җәлеп итү ноктасы буларак үсә барган әһәмияте турында сөйли.

Тантаналар кысаларында шәһәрнең үзәк мәйданына символик плитә салынды. Премьер-министр бу вакыйганы Сибай тарихында яңа битнең башы дип атады, ул яңа инвестицион проектларны эшләтеп җибәрүне дә, гамәлгә ашырыла торган инвестицион проектларны үстерүне дә чагылдыра.

Ул шулай ук билгеләп үткәнчә, шәһәр елдан-ел төзекләнә, заманчарак һәм яшәү өчен уңайлырак була бара. Шул ук вакытта, аның фикеренчә, Сибайның төп байлыгы булып аның халкы — үзенең кече ватанын яратучылар һәм аны көн саен яхшырак итүчеләр кала.

Шулай ук Назаров шәһәрнең икътисади каркасын формалаштыручы предприятиеләргә ышанычлы партнерлык өчен рәхмәт белдерде, ә сибайлыларга ныклы сәламәтлек, иминлек һәм туган җирләрендә бәхет теләде.

Юлай НИЗАЕВ әзерләде.

Фото: "Молодежная газета".