Цирк язмышы турында сөйләштеләр

Уфада «АРТ-Корылтай» V Халыкара мәдәни форумы кысаларында «Росгосцирк» ФКП филиалы – Уфа дәүләт циркын реконструкцияләү һәм реставрацияләү буенча эшлекле киңәшмә узды. Фикер алышуда Башкортстан Республикасы Хөкүмәте Премьер-министрының беренче урынбасары Урал Кильсенбаев, Башкортстан Республикасы мәдәният министры Әминә Шәфыйкова, Вернадский проспектындагы Зур Мәскәү дәүләт циркы генераль директоры Эдгард Запашный һәм башкалар катнашты.

Төбәк әһәмиятендәге архитектура һәйкәле һәм федераль милек булган Уфа дәүләт циркы 1968 елда төзелгән. Әмма төзелгәннән бирле капиталь ремонт һәм реконструкция үткәрелмәгән. Бинаның авария хәлендәге булуы 2017 елда Уфаның Октябрь район суды тарафыннан циркны реконструкция уздырганчы эксплуатацияләүне тыюга китергән.

2021 елда Башкортстан Республикасы Башлыгы Радий Хәбиров кушуы буенча проект-смета документациясе эшләнде, ул бюджеттан тыш акчалар хисабына «Главгосэкспертиза России» ФАУ Дәүләт экспертизасының уңай бәяләмәсен алды.

Эдгард Запашный, бинаны карап чыккач, циркның, түбәсен ремонтлау һәм терлекләрне тотуның заманча нормаларына яраклаштыру кирәклегенә карамастан, канәгатьләнерлек хәлдә булуын билгеләп үтте. Ул ассызыклаганча, республика җитәкчелеге циркның мәдәни мәйданчык буларак эшен яңадан башлап җибәрергә тели һәм тиздән эшләр башланачагына ышаныч белдерде.

- Карар бер генә: цирк игътибарга мохтаҗ, чөнки ул шактый озак эшләми торган. Хәер, дөресен генә әйткәндә, мин аның хәле начаррак дип уйлаган идем. Бу алай түгел. Аның турында кайгырталар, ул ягыла, кешеләр үз урыннарында кала, – дип уртаклашты Эдгард Запашный.

Башкортстан Республикасы Хөкүмәтендә хәбәр итүләренчә, Уфа циркын реконструкцияләүгә федераль бюджетта 2 миллиард сум акча каралган. Түбәләрне ремонтлауны һәм терлекләр өчен биналарны заманча таләпләргә туры китереп яңартуны үз эченә алган эшләр 2028 елда тәмамланырга тиеш. Цирк манежы нормаларга туры килә һәм киңәйтүне таләп итми.