Сәнәгатьне үстерү буенча республика советы узды

14 март көнне Уфа районында Башкортстан Башлыгы Радий Хәбиров Сәнәгатьне үстерү буенча республика советының беренче утырышын үткәрде. Элегрәк төбәк җитәкчесе әлеге институтны булдыру турында Указга кул куйган иде, ул сәнәгать сәясәтенең нәтиҗәлелеген арттырырга һәм илнең милли максатларын тормышка ашыруны тәэмин итәргә тиеш.

Совет утырышы «Зубово» технопаркы мәйданчыгында узды. Анда Русия Федерациясе Сәнәгать һәм сәүдә министры урынбасары, Совет рәистәше Иван Куликов, профильле федераль ведомстволар һәм үсеш институтлары җитәкчеләре, шулай ук Башкортстанның һәм илнең әйдәп баручы предприятиеләре вәкилләре катнашты.

- Бүген без Башкортстан Республикасы Сәнәгатен үстерү советы эшенә старт бирәбез. Яңа орган сәнәгать сәясәтен гамәлгә ашыруда нәтиҗәле инструмент булыр дип ышанам, – дип ассызыклады Радий Хәбиров. Төбәк җитәкчесе ил Хөкүмәте Рәисенең беренче урынбасары Денис Мантуровка һәм Русия Сәнәгать һәм сәүдә министрлыгы җитәкчелегенә республиканың мөһим проектларына һәм инициативаларына ярдәм иткәннәре өчен рәхмәт белдерде.

- Министрлык безнең әйдәп баручы һәм нәтиҗәле партнерыбыз. Нәтиҗәле хезмәттәшлек өчен рәхмәт, - диде Радий Хәбиров. 2024 елның төп нәтиҗәләре турында сөйләгәндә, төбәк җитәкчесе Башкортстан предприятиеләренең республиканың тотрыклы үсешенә, илнең технологик суверенитетын һәм оборона сәләтен ныгытуга керткән зур өлешен билгеләп үтте.