Иң күп акча – безнең коммерцияле булмаган оешмаларга

2025 елда коммерцияле булмаган оешмалар өчен төбәк конкурсларын финанслашуга Башкортстан 107 млн сум алды.

Республика өченче ел рәттән төбәк конкурсларын Президент грантлары фондыннан финанслашуның иң күп суммасын ала. 2025 елда бу сумма 107,4 миллион сум тәшкил итте. Мондый карар 21 гыйнварда Гражданлык җәмгыятен үстерүгә Русия Федерациясе Президенты грантларын бирүгә конкурслар үткәрү буенча координация комитеты утырышында кабул ителде.

2021 елдан БР Башлыгы Грантлары фонды Русия Президенты грантларын бирү конкурсында катнаша. Җиңү критерийларының берсе – коммерцияле булмаган оешмаларның Фондның грант конкурсларында актив катнашуы.

Шушы вакыт эчендә республикага рекордлы 472,2 миллион сум җәлеп ителгән: 2021 елда – 74,8 млн. сум, 2022 елда – 101,5 млн. сум, 2023 елда – 98,2 млн. сум, 2024 елда – 90,3 млн. сум, ә 2025 елда. – 107,4 млн. сум. Мондый югары күрсәткечләргә ирешү һәм федераль дәрәҗәдә алдынгы урыннарны саклап калу республиканың коммерцияле булмаган секторының активлыгы һәм төбәкнең грантлар операторы – Башкортстан Башлыгы грантлары фондының җайга салынган эше нәтиҗәсендә мөмкин булды.

“Президент грантлары фондының төбәк конкурсларын уртак финанслау программасы ярдәмендә безнең, төбәкнең грантлар операторлары буларак, кешеләргә ярдәм итә торган тагын да кирәкле проектларга ярдәм итү мөмкинлеге бар”, – ди Башкортстан Башлыгы грантлар фонды генераль директоры Люция Сәйфуллина.

Әйткәндәй, ил җитәкчесе Владимир Путин сүзләренчә, Президент грантлары фонды ярдәм итә торган социаль проектлар бик мөһим мәсьәләләрне хәл итүгә юнәлеш алалар.