Яңа ел чыршысын мандариннарга алмаштырырга була

Уфада яңа ел чыршыларын мандариннарга алмашка тапшырырга мөмкин.

Тере агачларны 4 көн буена шәһәрнең төрле районнарындагы 11 мәйданчыкта җыячаклар. Мәйданчыклар 18 һәм 19 гыйнварда 12.00дән 16.00 сәгатькә кадәр эшләячәк. Агачларны 25 һәм 26 гыйнварда да тапшырырга мөмкин булачак.

Чыршыларны ничек бар – шулай: кагылган такталарсыз һәм уенчык-мишурасыз кабул итәләр. Аларны эшкәртүгә озатачаклар.

Мәйданчыкларның адреслары:

• Магистраль урам, 2А;
• Столяров урамы, 2;
• Мушников урамы, 11;
• Гвардия урамы, 58/1;
• Гагарин урамы, 10/2;
• М. Гобәйдуллин урамы, 6, “Аркада” сәүдә комплексы каршында;
• Кольцевая урамы, 50-61 (Колхоз базары);
• “4 сезон” скверы;
• “Курай чәчәге" скверы;
• “Сосны” микрорайоны;
• СССРның 50 еллыгы урамы ягыннан “Башкирия” сәүдә комплексы янындагы автопарковка.

Чыршыларны чүплеккә чыгарып ыргытканчы, югарыдагы мәйданчыкларның берсенә илтеп тапшыру, өстәвенә, моның өчен күчтәнәч тә алу, күпкә яхшырак булыр, мөгаен. Килешәсезме?