Бәйрәм белән!

Башкортстан Башлыгы Радий Хәбиров Русия Федерациясе иминлек органнары хезмәткәрләре көненә багышланган тантаналы җыелышта чыгыш ясады һәм Русия Федераль хәвефсезлек хезмәтенең республика буенча идарәсе хезмәткәрләренә дәүләт бүләкләрен тапшырды.

-Илебезнең махсус хезмәтләре Ватаныбызның милли иминлеген һәм суверенитетын тәэмин итүдә һәрвакыт төп роль уйнады һәм уйный. Җәмгыять сезнең җаваплы һәм киеренке хезмәтегезне югары бәяли. Ул бүген махсус хәрби операция үткәрү шартларында аеруча әһәмиятле. Килеп туган куркынычлар барыбыздан да нәтиҗәле эшләүне, уяулыкны арттыруны, җәмгыятебезнең бердәмлеген ныгытуны таләп итә, – диде Радий Хәбиров. - Башкортстан федераль хәвефсезлек хезмәте идарәсе экстремистлар белән уңышлы көрәшә, терактларны һәм хокукка каршы гамәлләрне туктата. Сез тотрыклылыкка янаган куркынычларны вакытында ачыклауда республика хакимияте органнарына зур ярдәм күрсәтәсез. Сезнең тарафтан коррупциягә каршы көрәш планында күп эш башкарыла. Сезгә хәл итәргә туры килгән бурычлар җирле үзенчәлекләрне, милли-дини үзенчәлекләрне, муниципалитетларыбызның икътисадый һәм иҗтимагый тормышын тирәнтен белүне таләп итә. Көч структураларына, барлык дәрәҗәдәге хакимият органнарына киләчәктә дә шулай ук бердәм, системалы, тыгыз хезмәттәшлектә эшләргә кирәк.

Регион җитәкчесе хәвефсезлек органнары ветераннарына үз тәҗрибәләрен яңа буынга тапшырулары өчен аерым рәхмәт белдерде.

Русия Федераль куркынычсызлык хезмәтенең Башкортстан буенча идарәсе башлыгы Игорь Кочнев махсус хезмәтләр алып бара торган эшнең мөһимлеген билгеләп үтте һәм төбәк җитәкчелегенә ярдәмнәре өчен рәхмәт белдерде.