Авылда почта бүлеге ачылды

Авыргазы районы Толбазы авылында яшәүчеләр хәзер тиз тергезелә торган конструкцияләрдән яңа бүлекчәдә почта хезмәте алалар. Ул авыл бүлекчәләрен модернизацияләү программасы буенча куелган.

Бүлекне ачу тантанасында Башкортстан Хөкүмәте премьер-министры урынбасары вазифаларын башкаручы Ирек Сәгыйтов, Авыргазы районы хакимияте башлыгы Арслан Шаһаретдинов һәм Федераль почта элемтәсенең Башкортстан идарәсе директоры Ленард Шәфыйков катнашты.

– Башкортстанда почта челтәре даими рәвештә үсә, хезмәт күрсәтү сыйфаты яхшыра, күрсәтелә торган хезмәтләр исемлеге киңәя. Авыргазы районында өч почта бүлекчәсе яңартылды, – диде үзенең сәламләү сүзендә Ирек Сәгыйтов.

– Модернизацияләүнең төп бурычы – авыл халкына заманча һәм уңайлы бүлекләрдә почта һәм финанс хезмәтләре алу мөмкинлеге бирү генә түгел, ә аларны социаль һәм дәүләт сервисларының туплану ноктасы итү. Барлык ремонт һәм монтаж эшләрен җирле подрядчылар башкаруын аерым билгеләп үтәм. Бу төбәктәге бизнеска өстәмә ярдәм булып тора, – дип сөйләде Ленард Шәфыйков.

Почта бүлекчәсе 10000нән артык кешегә хезмәт күрсәтә. Бүлек атнага алты көн эшли.