Шәһәр мэры СВОга киткән

Сибай хакимияте башлыгы Азамат Юлдашбаев махсус хәрби операция зонасында хезмәт итәргә юлланды.

Азамат Юлдашбаев белән контракт буенча алгы сызыкка шулай ук Сибай һәм Хәйбулла районнары хәрби комиссары Ринат Зәбиров, Сибай депутаты Әхәт Асылбаев та китте.

Азамат Юлдашбаевның СВОга юллануы турында бүгенге оператив киңәшмәдә төбәк җитәкчесе Радий Хәбиров та телгә алды.

“Азамат Морзагалиевичка зур рәхмәт. Аңа безнең ихтирамыбыз. Гади булмаган карар, әлбәттә. Аның белән бергә Сибай һәм Хәйбулла районнары хәрби комиссары Зәбиров Ринат Фәнил улы, Сибай депутаты Асылбаев Әхәт Әхмәт улы, “Башмедь” компаниясе водителе Илбуллов Рамил Корбангали улы да СВОга китте. Без аларга рәхмәт әйтәбез. Илебезнең киләчәге махсус хәрби операциядә хәл ителүен барыбыз да аңлыйбыз”, – диде Радий Хәбиров.

Сибай хакимияте башлыгы вазифаларын башкару әлегә шәһәр мэрының беренче урынбасары Сергей Озерцовка йөкләнде.

Исегезгә төшерәбез: махсус хәрби операциядә хезмәт итәргә теләүчеләр Оборона министрлыгы белән контракт төзи һәм якташларына кушыла ала. Русия Президенты 1 августтан 31 декабрьгә кадәр контракт төзегән хәрби операциядә катнашучыларга 400 мең сум күләмендә бер тапкыр бирелә торган түләү турындагы указга кул куйды. Элегрәк Башкортстан Башлыгы Радий Хәбиров кушуы буенча контрактчыларга бер тапкыр бирелә торган түләү күләме арткан иде. Шулай итеп, федераль түләүләрне исәпкә алып, Башкортстаннан хәрбиләр бер мәртәбә 1 млн 205 мең сум алала.  

Сораулар булса, 122 яисә (347) 218-19-19 номеры буенча Ситуация үзәгенә, (347) 248-29-31 номеры буенча сайлап алу пунктына шалтыратырга мөмкин.