"Җиңел сәнәгать безнең өчен зур әһәмияткә ия"

- Җиңел сәнәгать безнең өчен зур әһәмияткә ия. Әмма республиканың барлык җитештерү күләмендә легпром әлегә 1 проценттан да кимрәк өлешне алып тора. Шуңа күрә тармакны үстерү – Башкортстанның дәүләт сәясәтенең мөһим юнәлеше. Һәм без моны киң спектрлы ярдәм чаралары белән раслыйбыз, - диде Радий Хәбиров.

Төбәк җитәкчесе хәбәр иткәнчә, соңгы елларда җитештерүчеләргә чимал, материаллар һәм җиһазлар сатып алуга бюджет субсидияләре 500 млн сумга җиткән. Алар нәтиҗәле эшлиләр, шуңа күрә республикада мондый ярдәмне киләчәктә дә саклап калачаклар.

Шул ук вакытта идарә командасы яңа дәүләт ярдәме чараларын эшли. Аерым алганда, легпром продукциясен сертификацияләү чыгымнарының бер өлешен каплау мөмкинлеген карыйлар. Моннан тыш, яңа проектлар төбәкнең инвестиция комитеты ярдәменнән соң өстенлекле статус ала ала. Бу салым ташламаларын алырга һәм инициативаларны гамәлгә ашыру чыгымнарының бер өлешен капларга мөмкинлек бирә.

- Без җиңел сәнәгать кластерын формалаштыру юлыннан барабыз. Тармак эшенең мондый форматы өстәмә федераль ярдәм алырга мөмкинлек бирә, - дип билгеләп үтте Радий Хәбиров. - Профильле предприятиеләр шулай ук Башкортстан сәнәгатен үстерү фондының ташламалы заемнарына һәм кече бизнесны үстерү программалары кысаларында бирелә торган преференцияләргә дә өмет итә ала.

Җиңел сәнәгать үсешенең хәзерге этабының мөһим өлеше – квалификацияле кадрлар әзерләү. Республика башлыгы белгечләрне җәлеп итү күп очракта лаеклы хезмәт шартларына, беренче чиратта, хезмәт хакына бәйле, дип ассызыклады. Аерым алганда, кием җитештерүдә ул аена уртача 27 мең сум тәшкил итә.

- Башкортстанда заманча производстволар барлыкка килә, яңа компетенцияләр формалаша. Бүген күп кенә компанияләр кадрлар кытлыгы кичерә, хезмәт ресурслары өчен көрәштә ярыша, – диде Радий Хәбиров. - Бу мәсьәләне лаеклы хезмәт шартлары булдыру, технологик процессларны автоматлаштыру, шулай ук республика көллиятләренең уку программаларын актуальләштерү хисабына хәл итәргә мөмкин.

Тармак үсешенең тагын бер юнәлеше – цифрлы сәүдә мәйданчыкларында – маркетплейсларда эшләү.

Үзенең чыгышы ахырында Башкортстан Башлыгы легпром предприятиеләре җитәкчеләренә һәм хезмәт коллективларына авыр һәм фидакарь хезмәтләре өчен рәхмәт белдерде.

- Сез, хөрмәтле хезмәттәшләр, сәнәгатьнең бик катлаулы секторында эшлисез, кайвакыт түбән маржинальлек белән эшлисез, – дип ассызыклады Радий Хәбиров. – Һәм махсус рәхмәт сүзләре безнең сугышчыларга, махсус хәрби операциядә катнашучыларга ярдәм итүчеләргә!

Чыганак: glavarb.ru