Билгеле җырчы Радик Динәхмәтов СВОга киткән

Билгеле җырчы һәм музыкант, Башкортстанның атказанган артисты Радик Динәхмәтов махсус хәрби операция зонасына хезмәт итәргә киткән. Аның СВОга үз теләге белән китүен “Юлдаш” радиосы хәбәр итте.

“Яңа вазифам – медвзвод санитары. Яралыларга тәүге ярдәм күрсәтергә өйрәнәбез. Шулай ук тулы хәрби әзерлек тә үтәргә тиешмен: ату, окоп, марш бросоклар... Без көн дә полигонда”, – ди җырчы.

Радик Динәхмәтовның җырлары күпләргә таныш. Аның “Әлдә син бар әле дөньяда”, “Зәңгәр күзле кызны сагынам” һәм башка җырларын күпләр үз итте. Ул 7 аудиоальбом, 4 CD-диск, 4 видеоальбом чыгарды.

Соңгы елларда җырчы “Атайсал – Кече Ватан” проектында актив катнашты.

“Өмет” гәзитенең дусты Радик Динәхмәтовка, исән-сау әйләнеп кайтып, тагын бик күп җырлары белән тамашачыларын сөендерүен телибез.