Чын кыш башландымы әле?

Ялларда һава торышы салкынча һәм карлы булачак.

Шимбә, 19 ноябрьдә, республика буенча җепшек кар, юлларның кайсыбер урыннарында кар сырынтылары, бозлавык көтелә. Һава температурасы төнен -3, -8 градус булса, төньяк-көнчыгыш районнарда -13 градуска кадәр төшәчәк. Көндез термометр баганалары -1, -6 градус тирәсендә торачак.

Якшәмбе, 20 ноябрьдә, болытлы булачак. Һава температурасы төнен -4, -9 градуска кадәр салкынайтса, көндез -4, -5 градус булачак. Шулай ук кар явачак.

“Яндекс Погода” мәгълүматы буенча, соңгы 10 елгы күрсәткечләр белән чагыштырганда, быелгы ноябрь шактый салкын. Уртача температура -2 градус салкын, диелгән.