Солдатларны иң арыткан әйбер нәрсә?

Шәйморатов һәм Доставалов исемендәге батальоннарның рухи остазы булган протоиерей Виктор Иванов сугышчыларны иң алҗыткан әйбер турында бәян иткән. Шул хакта ул “Вконтакте” социаль челтәрендәге сәхифәсенә язма урнаштырган.

Рухани сүзләренчә, блок-постта эшләү алдагы сызыктагы хезмәттән аерыла. Бу инженер корылмасы янында сугыш бармый, әмма анда эшләүнең хәвефе дә шуңа бәйле.

“Блок-постта хәрби хәрәкәтләр юк: анда документлар, машиналар тикшерелә. Көн буена бертөрле эш. Һәм менә шул “бер үк төрле” эш еш кына кешенең игътибарын югалттыра. Ә дошманнарның диверсия-эзләү төркеме гадәти гражданнар яки Русия армиясе хәрбиләре кыяфәтендә хәрәкәт итәргә мөмкин. Шулай ук блок-постны кулга төшерергә тырышу өчен автомобильне шартлатырга ихтималлар һәм башкалар. Шуңа игътибарлылык һәм тагын бер тапкыр игътибарлылык кирәк! Һәм менә шул игътибарлы булу, даими нерв киеренкелеге, ул-бу хәл килеп чыкса дип, нәрсәгәдер әзер тору сугышчыларны нык алҗыта. Шулай да аларның күбесе алтын урталыкны таба белә: теләсә нәрсә өчен стресска бирелмичә, игътибарны туплап эшли ала. Әйткәндәй, документларны тикшергәндә хәрбиләрне урнаштыруның үз кагыйдәләре дә бар хәттә”, – ди Виктор Иванов.

Солдатларыбыз, сәламәт булып, армый-алҗымый эшләп, исән-сау әйләнеп кайтсыннар.