Социаль хезмәтләр ничек күрсәтелә?

Уфаның “Торатау” Конгресс-холлында Башкортстан Башлыгы Радий Хәбиров һәм Русия финанслар министры урынбасары Алексей Лавров Русия Финанс министрлыгының семинар-киңәшмәсенең пленар сессиясендә катнаштылар. Аның темасы - социаль өлкәдә дәүләт заказын үтәү буенча сынау проектлары белән идарә итү.

Семинарда илнең финанс системасы һәм социаль өлкәсе экспертлары - федераль министрлыклар һәм ведомстволар, төбәк хакимият органнары вәкилләре, шулай ук коммерцияле булмаган оешмалар һәм үсеш институтлары белгечләре катнашты.

Киңәшмәдә республика Башлыгы Радий Хәбиров социаль заказ механизмнарын кертүнең актуальлеген ассызыклады, алар бизнеска бюджет финанславы нигезендә хезмәт күрсәтү хокукы өчен дәүләт учреждениеләре белән уңышлы көндәшлек итәргә мөмкинлек бирә.

Башкортстан Башлыгы төбәктә балаларга мәктәпкәчә белем бирү учреждениеләрендә өч яшькә кадәрге социаль сертификатларны файдалануның уңышлы тәҗрибәсе турында да сөйләде. Сертификатның суммасы - 6 мең сум. Быел республика бюджетыннан бу максатларга 137 миллион сум акча бүлеп бирелгән һәм 2 меңнән артык сертификат тапшырылган.

- Шуның аркасында халык үз балаларын гамәлдәге шәхси балалар бакчаларына бирә алган инде. Ә бу өлкәдә бизнес яхшы социаль заказ алды, ул җитди үсеш перспективаларын бирә, - диде Радий Хәбиров.

Алексей Лавров Башкортстанның социаль хезмәтләр күрсәтү системасын үстерүдәге уңышлы эш тәҗрибәсен билгеләп үтте. Бу аларның сыйфатын арттырырга мөмкинлек бирә, - диде ул.