Хәвефле чорга керәбез

Башкортстан халкын янгыннар чыгу хәвефе хакында кисәтәләр. Гадәттән тыш хәлләр буенча Башкортстан дәүләт комитеты мәгълүматлары буенча, 27 июльдән алып 1 августка кадәр республикада янгын чыгу хәвефе арта.

Моңа бәйле ведомство республика халкына һәм кунакларына:

–урманнарда учак якмаска (хәтта су буйларында да);

–яланнарда коры үләнне яндырмаска. Моны эшләгән кешене күргән очракта, туктатырга һәм аңлатырга тырышырга;

–тәмәке төпчекләре һәм шырпыларны җиргә ташламаска;

–урманнарга автомобильдә һәм мотоциклда кермәскә (глушитель очкыны янгынга сәбәп булырга мөмкин) киңәш итә.

Онытмагыз: коры үләнгә ташланган шешә, хәтта пыяла кисәкләре дә линза ролен үтәп, ут чыгара ала.

Табигатебезне бергә саклыйк!