Кушнаренкода реконструкциядән соң парк ачылды

Паркны реконструкцияләү җәмәгать тыңлаулары нәтиҗәсендә “Шәһәр мохите” республика проекты һәм “Заманча шәһәр мохите булдыру” муниципаль программага ярашлы башкарылды. Төзекләндерү чаралары 2018 елның 1 сентябрендә үк тәмамланган иде. Анда карт агачларны төпләү, вертикаль планировка, сукмаклар һәм мәйданчыкларга асфальт түшәү эшләре төгәлләнгән иде. Быелның 1 сентябренә тротуар плиткасы җәю, коймаларны алмаштыру, яңа капкалар урнаштыру тәмамланды. Паркта хәвефсез резина түшәлгән, махсус коймачыклы балалар мәйданчыгы корылган, эскәмияләр, чүп савытлары куелган һәм фонтан ремонтланган.

- Безнең паркның яңа тормышы башлана гына әле, - ди Кушнаренко районы башлыгы Руслан Гыйззәтуллин. – 7-12 яшьтәге балалар өчен спорт мәйданчыгы, паркур зонасы һәм тагы да башка объектлар төзү планнары бар. Шуңа бу паркка барлык тырышлыгыбызны, көчебезне салуны дәвам итәчәкбез.