Мәскәүдә дә бер кассир 41 миллион урлап качкан

Мәскәүдә бер эре оешманың генераль директоры 41 миллион сум акчасын АКШ долларларына алыштыру нияте белән банкка килә. Аны инкассация бүлеге хезмәткәрләре валюта алыштыру пунктына озатып куялар. Кассир акчаны санап ала да, кирәкле сумма өчен долларлар бераз җитми, заказ бирдек, бераздан китерәчәкләр, дип клиентына коридорда көтеп торырга куша.

Ир ике сәгать чамасы көтеп утыра. Аны чакыручы булмагач, үзе кереп сорарга уйлый. Ләкин ишек эчке яктан бикләнгән була. Урам якка чыгып, бүлмәнең тәрәзәсенә караса - ул ачык, ә бүлмәдә берсе дә күренми. Кассир акчалар белән тәрәзәдән чыгып качкан...

Полиция хезмәткәрләре чакыртыла һәм җинаять эше кузгатыла. Әлегә бур кассир табылмаган.