Җиләккәйгә рәхмәт әйтергә онытма!

   Утыртулар белән шактый арыткан май һәм алынган уңышларны тиз-тиз эш итүне таләп иткән август айлары белән чагыштырганда, июльдә бераз хәл алырга мөмкин, әлбәттә. Ләкин иркенләп китәргә әле иртәрәк, дуслар.

• Июль аенда киләсе уңышка нигез салына. Нәкъ менә июльдә киләсе елда төп уңыш бирә торган җимеш бөреләре барлыкка килә. Шуңа күрә бу чорда агач һәм куакларыгызны комплекслы ашламалар белән сыйлагыз.
• Җиләкне яратабыз да инде! Бу бик тә җаваплы чор. Вакытында җыелмаган тәмлекәйләр коелып әрәм була, яки аларны кошлар ашап бетерә, бозылып бетүләре дә мөмкин.
• Бакча җиләгенә килгәндә, куактан соңгы җиләкне өзгән вакытта, аңа рәхмәт әйтергә онытмагыз. Аннан инде, түтәлне йомшартып, куак төпләрен күмегез. Шулай ук вакыт-вакыт “мыекларны” кисеп тору кирәк булыр. Аларны вакытында кисү (әгәр дә үрчетү өчен кирәкмәсә!) җиләк куагына салкын кышларны җиңел үтәргә булышачак.

Фото: ugorizont.ru