Сентябрьдә бакча эшләре

Сентябрь, көз ае булса да, иркенләр вакыт түгел. Тәҗрибәле бакчачылар яхшы белә: бу чорда әле дистәләрчә кичектергесез эш көтә. Бакчада бүген дә тормыш гөрли, димәк, кул кушырып утырырга һич вакыт юк.

                          Бакчадагы иң мөһим бурычлар

• Яшелчә һәм җиләк-җимешләрне җыю вакыты. Сентябрь аенда соң өлгерүче алмалар һәм грушаларны җыеп алалар. Шулай ук кызыл миләш, көзге сливалар җыела. Уңышны аскы ботаклардан җыя башлап, өскә табан күтәреләләр. Соңгы сорт җимешләр (кышкы) озайлы вакытлар саклана, димәк, аларны озак саклар өчен уңайлы урынны алдан кайгыртырга кирәк.
• Куак һәм агачлар төбенә ашламалар кертегез. Җимеш бирүче үсентеләр көзгә арып, хәлсезләнә төшә, димәк, бу чорда аларны тукландырырга кирәк. Көзен туфракка азотлы ашламалар кертмиләр, юкса яфрак һәм яшь ботакларның үсешкә кузгалуы мөмкин. Ә менә калийлы һәм фосфорлылары белән сыйларга кирәк. Моның өчен бүген бакчачылар өчен кибетләрендә “көзге” минераль комплексларны сатып алырга мөмкин. Шулай ук көл, суперфосфат, “сернокислый” һәм хлорлы калий кулланырга кирәк.
• Бакчаны корткычлардан тазартыгыз.

  Агачлардан  һәм куаклардан яфраклар коелмас һәм кышлаучы корткычлар туфракка чуммас борын бакчаны инсектисидлар белән эшкәртергә мөмкин. Бу максатка Актара, Инта-Вир яки аның аналоглары яхшы булачак. Эшкәртү кебек җаваплы эшне октябрьгә калдырмау яхшы – юкса, күп корткычлар тирән туфракка күмелергә өлгерерләр. Моннан тыш, яфраклар коелганнан соң агачларны башка чаралар белән дә эшкәртәсе бар әле.

Фото: profermu.com

                    ----------------------------------------------------  

   Әйе, сентябрьдә инде күпчелек яшелчә-җимешләр җыеп саклауга куелган, кышкылыкка дип ябылган банкалар базларга төшерелгән, җәйге чәчәкләр дә киләсе мизгелгә кадәр саубуллашкан була. Ләкин, эшләр әле күп дидек, шулай булгач, салкын төннәр һәм беренче көзге яңгырлар безнең эшләргә киртә булырга тиеш түгел, чөнки киләсе елгы уңыш өчен бүгеннән тырышлык салу мөһим.