Алар да яшәртү көтә...

*Куакларны кар баса. Ботаклары сынмасын өчен каткан карны селкеп төшерегез.

*Мартта карлыган һәм крыжовник куакларын яшәртәләр. Биш еллык кара карлыганнарның куерган ботакларын кисеп атыгыз. Кызыл һәм ак карлыган, крыжовник куакларына чират 6-8 яшьтә җитә. Мондый “яшәртү” җиләкләрнең эре һәм тәмле, күп булуына булышлык итә.

*Кара карлыган куагында юан-бүртенгән бөреләр юкмы икәнен тикшерегез. Мондый бөре анда бөре талпаны кышлавын дәлилли. Аларны җыеп яндырыгыз. Әгәр ботакта мондый бөреләр күп булса, ботагы белән кисеп яндырыгыз.

*Карлыган һәм крыжовникларны “кайнар душ” белән эшкәртү уңышлы. Моның өчен суны 80-90 градускача кайнарлап, дуршлак белән куак өстенә сибәбез (бөреләр ачылганчы).

*Мартта көздән бәйләп, җиргә егып салынган кура җиләге куакларын чишегез, аларны корган ботаклардан арындырыгыз.

*Җирдә кар кимү белән үк жимолость куакларына игътибар бүлегез: аларны сут йөреше башланганчы ук сирәкләгез (сут аларда башкаларга караганда иртәрәк кузгала).

*Бакчаны тазартканда кисеп алынган бар ботакларны да яндырыгыз.

Фото: zelenj.ru